ഐ.എസിന് വേണ്ടി കേരളത്തില്‍ ചാവേറാക്രമണത്തിന് പദ്ധതിയിട്ടെന്ന കേസില്‍ പാലക്കാട് സ്വദേശി റിയാസ് അബൂബക്കറിന് പത്ത് വര്‍ഷം കഠിന തടവിന് ശിക്ഷ വിധിച്ച് കൊച്ചി എന്‍ഐഎ കോടതി. വിവിധ വകുപ്പുകള്‍ പ്രകാരം 25 വര്‍ഷത്തെ കഠിനതടവിന് ശിക്ഷിച്ചിട്ടുണ്ടെങ്കിലും ശിക്ഷ ഒരുമിച്ച് അനുഭവിച്ചാല്‍ മതിയാകും.
പിഴയായി 1,25,000 രൂപയും വിധിച്ചിട്ടുണ്ട്. നാല് വര്‍ഷം പ്രതി ജയിലില്‍ കഴിഞ്ഞ കാലാവധി ശിക്ഷയില്‍ ഇളവ് ചെയ്യും. പ്രതി സമൂഹത്തെ നശിപ്പിക്കാനാണ് ശ്രമിച്ചതെന്നും പരമാവധി ശിക്ഷ നല്‍കണമെന്നും പ്രോസിക്യൂഷന്‍ കോടതിയില്‍ ആവശ്യപ്പെട്ടിരുന്നു. ഭീകര സംഘടനയായ ഐ.എസിന് വേണ്ടി കേരളത്തില്‍ ചാവേറാക്രമണത്തിന് പദ്ധതിയിട്ടെന്ന കേസില്‍ 2018ലാണ് റിയാസ് അബൂബക്കര്‍ എന്‍.ഐ.എയുടെ പിടിയിലായത്.
ഇയാള്‍ക്കെതിരെ ചുമത്തിയ യു.എ.പി.എ വകുപ്പുകളും ഗൂഢാലോചന കുറ്റവും കോടതിയില്‍ തെളിഞ്ഞിട്ടുണ്ട്. റിയാസിനൊപ്പം പിടിയിലായ രണ്ട് പേരെ കേസില്‍ എന്‍ഐഎ മാപ്പ് സാക്ഷിയാക്കുകയും ചെയ്തിരുന്നു.
