രാജ്യത്ത് ഏക സിവില്‍ കോഡ് നടപ്പാക്കാനുള്ള കേന്ദ്ര സര്‍ക്കാര്‍ നീക്കത്തിനെതിരെ സിപിഐഎം നടത്തുന്ന ദേശീയ സെമിനാറില്‍ പങ്കെടുക്കുമെന്ന് സമസ്ത കേരള ജംഇയ്യത്തുല്‍ ഉലമ സംസ്ഥാന പ്രസിഡന്റ് ജിഫ്രി മുത്തുക്കോയ തങ്ങള്‍ അറിയിച്ചു. പൗരത്വ ഭേദഗതി ബില്ലിനെതിരായ സമരങ്ങളില്‍ സഹകരിച്ചതു പോലെ ഈ വിഷയത്തിലും സഹകരിക്കുമെന്നാണ് സമസ്ത അറിയിച്ചത്. കോഴിക്കോട് സംഘടിപ്പിച്ച പ്രത്യേക കണ്‍വെന്‍ഷനിലാണ് പ്രഖ്യാപിച്ചത്.
കോണ്‍ഗ്രസുമായും ലീഗുമായും സമസ്ത സഹകരിക്കും. എല്ലാ പൊതു സ്വഭാവമുള്ള പരിപാടികളിലും വിഷയത്തില്‍ സമസ്ത സഹകരിക്കുമെന്നും ആര് നല്ല കാര്യം ചെയ്താലും അവര്‍ക്കൊപ്പം നില്‍ക്കുമെന്നും ജിഫ്രി മുത്തുക്കോയ തങ്ങള്‍ അറിയിച്ചു.
ഏക സിവില്‍ കോഡ് നടപ്പാക്കുന്നതിനെതിരെ സമസ്ത നേതൃത്വം പ്രധാനമന്ത്രി നരേന്ദ്ര മോദിയെ കാണുമെന്നും അദ്ദേഹത്തിന് നേരിട്ട് നിവേദനം നല്‍കുമെന്നും സമസ്ത അറിയിച്ചു.
ഏക സിവില്‍ കോഡ് മുസ്ലിം വിഭാഗത്തെ മാത്രം ബാധിക്കുന്ന വിഷയമല്ല. സിവില്‍ കോഡ് എന്താണെന്ന് ഇപ്പോഴും വ്യക്തമല്ല. ഭരണ കേന്ദ്രങ്ങളില്‍ നിന്ന് ജനങ്ങള്‍ക്ക് പ്രയാസം ഉണ്ടാകാന്‍ പാടില്ല. ഏത് നിയമവും ഭരണഘടനയ്ക്ക് അനുസൃതമാകണം. ഓരോ മതങ്ങള്‍ക്കും വിശ്വാസമനുസരിച്ച് ജീവിക്കാന്‍ ഭരണഘടന അവകാശം നല്‍കുന്നുണ്ടെന്നും ജിഫ്രി മുത്തുക്കോയ തങ്ങള്‍ പറഞ്ഞു.
