വന്ദേ ഭാരതിന്റെ രണ്ടാംഘട്ട ട്രയല് റണ് ഇന്ന് തിരുവനന്തപുരം തമ്പാനൂര് മുതല് കാസര്ഗോഡ് വരെ. രാവിലെ 5.20ന് തിരുവനന്തപുരം സെന്ട്രലില് നിന്ന് പുറപ്പെട്ട ട്രെയിന് മൂന്ന് മണിക്കൂര് 12 മിനിറ്റ് കൊണ്ട് എറണാകുളത്ത് എത്തി. ആദ്യ യാത്രയെക്കാള് ആറ് മിനിറ്റ് കുറവ് സമയമെടുത്താണ് ട്രെയിന് എറണാകുളത്ത് എത്തിയത്.
എട്ടര മണിക്കൂര് കൊണ്ട് കാസര്ഗോഡ് എത്തുമെന്നാണ് പ്രതീക്ഷിക്കുന്നത്. തിരിച്ച് തിരുവനന്തപുരത്തേക്കും പരീക്ഷണ ഓട്ടം നടത്തും. ട്രെയിനിന്റെ വേഗതയും സുരക്ഷയും ഉറപ്പാക്കാനാണ് പരീക്ഷണ ഓട്ടം വീണ്ടും നടത്തുന്നത്.
വന്ദേ ഭാരത് എക്സ്പ്രസ് കാസര്ഗോഡുവരെ ഉണ്ടാകുമെന്ന് കേന്ദ്ര റെയില്വേ മന്ത്രി അശ്വിനി വൈഷ്ണവ് കഴിഞ്ഞദിവസം പ്രഖ്യാപിച്ചിരുന്നു. ട്രെയിന് കാസര്ഗോഡുവരെ നീട്ടണമെന്ന നിരന്തര ആവശ്യത്തെ തുടര്ന്നാണ് റെയില്വേയുടെ നടപടി. ആദ്യം തിരുവനന്തപുരത്ത് നിന്ന് കണ്ണൂര് വരെയുള്ള സര്വീസാണ് പ്രഖ്യാപിച്ചിരുന്നത്.
രണ്ട് ഘട്ടമായി വേന്ദ ഭാരതിന്റെ ട്രാക്ക് പരിഷ്കരണം നടപ്പാക്കും. ഇതോടെ നിലവില് മണിക്കൂറില് 70-80 കിലോമീറ്റര് വേഗത്തിലോടുന്ന കേരളത്തിലെ റെയില്പാളങ്ങളെല്ലാം 110 കിലോമീറ്ററിലേക്ക് മാറും. അതേസമയം വന്ദേഭാരതിന് കൂടുതല് സ്റ്റോപ്പുകള് അനുവദിക്കില്ല. പകരം കൂടുതല് ട്രെയിന് അനുവദിക്കുമെന്നും മന്ത്രി പറഞ്ഞു.
ഈ മാസം 25ന് ആരംഭിക്കുന്ന വന്ദേ ഭാരത് പ്രധാനമന്ത്രി നരേന്ദ്രമോദി ഫ്ളാഗ് ഓഫ് ചെയ്യും.