ദേശീയ ഗുസ്തി ഫെഡറേഷന് അധ്യക്ഷന് ബ്രിജ് ഭൂഷനെതിരെ വീണ്ടും ഗുസ്തി താരങ്ങള് രംഗത്ത്. പൊലീസില് പരാതി നല്കിയിട്ടും കേസെടുക്കാന് തയ്യാറാവാത്തതില് പ്രതിഷേധിച്ചാണ് ഗുസ്തി താരങ്ങള് ജന്തര് മന്ദറിലെത്തിയത്.
ബ്രിജ് ഭൂഷനെതിരെ വനിതാ ഗുസ്തി താരങ്ങള് നേരത്തെ ലൈംഗിക ആരോപണം ഉന്നയിച്ചിരുന്നു. ബ്രിജ് ഭൂഷനെതിരെ താരങ്ങള് നേരത്തെയും ജന്തര് മന്ദറില് സമരം ചെയ്തിരുന്നു. ഇതിന് പിന്നാലെ കായിക മന്ത്രാലയം അന്വേഷിക്കുന്നതിനായി ഒരു സമിതിയെ നിയോഗിക്കുകയും ചെയ്തിരുന്നു. എന്നാല് സമിതി ഇതുവരെ റിപ്പോര്ട്ട് സമര്പ്പിച്ചിട്ടില്ല.
ഇതിന് പിന്നാലെയാണ് പ്രായപൂര്ത്തിയാകാത്ത ഗുസ്തി താരമടക്കം ഏഴ് വനിതാ ഗുസ്തി താരങ്ങള് ബ്രിജ് ഭൂഷനെതിരെ പാര്ലമെന്റ് സ്ട്രീറ്റിലെ ധാന പൊലീസ് സ്റ്റേഷനില് രണ്ട് ദിവസം മുമ്പ് പരാതി നല്കിയത്. എന്നാല് പരാതിയില് എഫ്.ഐ.ആര് രജിസ്റ്റര് ചെയ്യാനോ കേസ് എടുത്ത് അന്വേഷിക്കാനോ പൊലീസ് തയ്യാറാകാത്തതോടെയാണ് താരങ്ങള് വീണ്ടും പ്രതിഷേധവുമായി രംഗത്തെത്തിയത്.
ഒളിംപിക്സ് വെങ്കല മെഡല് ജേതാവായ ബജ്രംഗ് പൂനിയയും പിന്തുണയോടെ രംഗത്തെത്തിയിട്ടുണ്ട്.