പെരുന്നാൾ പ്രമാണിച്ച് യുഎഇയിൽ അനധികൃതമായി പടക്കം പൊട്ടിക്കുന്നവർക്ക് മുന്നറിയിപ്പ്. ലൈസൻസില്ലാതെ സ്ഫോടക വസ്തുക്കൾ കൈകാര്യം ചെയ്യുകയോ വിൽക്കുകയോ കൈവശം വയ്ക്കുകയോ ചെയ്താൽ ഫെഡറൽ ഡിക്രീ ലോ 17 , ആർട്ടിക്കിൾ 54 പ്രകാരം ഒരു ലക്ഷം ദിർഹം പിഴയും ഒരു വർഷം തടവും ശിക്ഷയായി ലഭിക്കും. രാജ്യത്തെ ജനങ്ങളുടെ സുരക്ഷ മുൻനിർത്തിയാണ് നടപടിയെന്ന് അധികൃതർ വ്യക്തമാക്കി.
പെരുന്നാൾ ആഘോഷത്തിനൊപ്പം സുരക്ഷയെ കുറിച്ചും ജനങ്ങൾ ബോധവാന്മാരാകണമെന്ന് അബുദാബി പൊലീസ് ഓർപ്പെടുത്തി. പടക്കം പൊട്ടിക്കുന്നത് മൂലം കുട്ടികൾക്കും മുതിർന്നവർക്കും ആരോഗ്യപ്രശ്നങ്ങൾ ഉണ്ടാകും. ചെറിയ അശ്രദ്ധ പോലും വലിയ ആപത്തിലേക്ക് നയിച്ചേക്കാമെന്നും അബുദാബി പൊലീസ് മുന്നറിയിപ്പ് നൽകി. ഇത് സംബന്ധിച്ച് സമൂഹ മാധ്യമങ്ങൾ വഴി ബോധവൽക്കരണ പരിപാടികളും ആരംഭിച്ചിട്ടുണ്ട്.
നിയമം ലംഘിക്കുന്നവരെ പറ്റിയുള്ള വിവരം 999 എന്ന നമ്പറിലോ 8002626 എന്ന ടോൾ ഫ്രീ നമ്പറിലോ വിളിച്ചറിയിക്കാനും പൊതുജനങ്ങൾക്ക് നിർദേശം നൽകി.