യുഎഇയിൽ ഞായറാഴ്ച താപനില 30 ഡിഗ്രി സെൽഷ്യസ് കടക്കുമെന്ന് ദേശീയ കാലാവസ്ഥാ കേന്ദ്രം അറിയിച്ചു. അടുത്ത ആഴ്ച മഴ പ്രതീക്ഷിക്കുന്നതായും അറിയിപ്പുണ്ട്.
തിങ്കളാഴ്ച ദുബായിൽ താപനില 32 ഡിഗ്രി സെൽഷ്യസും അബുദാബിയിൽ 35 ഡിഗ്രി സെൽഷ്യസും ആയിരിക്കുമെന്നും ആകാശം മേഘാവൃതമായിരിക്കുമെന്നും അറിയിപ്പിലുണ്ട്.
തിങ്കൾ, ചൊവ്വ ദിവസങ്ങളിലാണ് മഴ സാധ്യത പ്രവചിച്ചിരിക്കുന്നത്. അന്തരീക്ഷം പൊടി നിറഞ്ഞതായും ഭാഗികമായോ ചിലപ്പോൾ പൂർണമായോ മേഘാവൃതവുമായും കാണപ്പെട്ടേക്കാം. രാജ്യത്തിൻ്റെ വിവിധ ഭാഗങ്ങളിൽ പ്രത്യേകിച്ച് വടക്കൻ, കിഴക്ക്, തീരപ്രദേശങ്ങളിൽ മഴയ്ക്ക് സാധ്യത കൂടുതലാണ്. താപനിലയിലെ വ്യതിയാനം, മേഘാവൃതമായ അന്തരീക്ഷം, മൂടൽമഞ്ഞ് തുടങ്ങിയവ കാറ്റിൽ സമ്മർദ്ദമേൽപ്പിക്കും. അതുകൊണ്ടുതന്നെ അറേബ്യൻ ഗൾഫും ഒമാൻ ഉൾക്കടലും പ്രക്ഷുബ്ധമായിരിക്കാനാണ് സാധ്യത.