എമിറേറ്റ്സ് ഐഡി അപേക്ഷയിൽ യുഎഇ മാറ്റങ്ങൾ വരുത്തുന്നു. ഐഡന്റിറ്റി, സിറ്റിസൺഷിപ്പ്, കസ്റ്റംസ് & പോർട്ട് സെക്യൂരിറ്റി അതോറിറ്റി (ഐസിപി)യാണ് പുതിയ എമിറേറ്റ്സ് ഐഡി രജിസ്ട്രേഷൻ ഫോം അവതരിപ്പിച്ചത്. ഏഴ് പുതിയ മാറ്റങ്ങൾ ഉൾപ്പെടുന്നതാൻ പുതിയ രജിസ്ട്രേഷൻ ഫോം. അപേക്ഷ പ്രക്രിയ സുഗമമാക്കുന്നതിൻ്റെ ഭാഗമായാണിത്.
അതോറിറ്റിയുടെ ‘വിഷ്വൽ ഐഡന്റിറ്റി’ക്ക് അനുസൃതമായാണ് പുതിയ അപേക്ഷ ക്രമീകരിച്ചിരിക്കുന്നത്. കാഴ്ചയിൽ തന്നെ എമിറേറ്റ്സ് ഐഡി തിരിച്ചറിയാനാകുമെന്നതാണ് ഇതിന്റെ പ്രത്യേകത. അപേക്ഷയുടെ മുകളിൽ ഇടതുവശത്തായി അപേക്ഷകരുടെ വ്യക്തിഗത ഫോട്ടോ പതിക്കുന്നതിനുള്ള ഇടം നൽകിയിട്ടുണ്ട്. കൂടാതെ അപേക്ഷയുടെ മുകളിൽ വലതുവശത്തുള്ള ക്യുആർ കോഡ് സ്കാൻ ചെയ്ത് ആപ്ലിക്കേഷൻ ട്രാക്ക് ചെയ്യാനുള്ള സംവിധാനവും ഏർപ്പെടുത്തിയിട്ടുണ്ട്.
അപേക്ഷിക്കേണ്ട വിധം സംബന്ധിച്ച വിശദീകരണം പുതിയ ഫോമിൽ ഉൾപ്പെടുത്തിയിട്ടുണ്ടെന്നതാണ് മറ്റൊരു പ്രത്യേകത. കൂടാതെ കാർഡ് ഡെലിവർ ചെയ്യുന്ന കമ്പനിയുടെ പേര് ഫോമിൻ്റെ താഴെ ഇടതുവശത്തായി വിലാസത്തോടൊപ്പം രേഖപ്പെടുത്തിയിട്ടുണ്ടെന്നതും പുതിയ ഫോമിന്റെ പ്രത്യേകതയാണ്. അതേസമയം ഐസിപിയിൽ പരാതികൾ രജിസ്റ്റർ ചെയ്യുന്നതിനും മറ്റുമായി ഉപഭോക്തൃ വോയ്സ് ഗേറ്റ് വേ ആക്സസ് ചെയ്യുന്നതിനുള്ള ക്യുആർ കോഡും ഫോമിൽ ചേർത്തിട്ടുണ്ട്. ഇത് കൂടാതെ ഫിംഗർപ്രിന്റ് സ്‌കാനിങിനായുള്ള തീയതി പരിഷ്‌ക്കരിക്കാൻ അപേക്ഷകനെ അനുവദിക്കുന്ന മറ്റൊരു ക്യുആർ കോഡുമുണ്ട്.
