ഒരാള്‍ മാത്രം പ്രതികരിച്ചതുകൊണ്ട് എന്ത് മാറ്റമാണ് സമൂഹത്തില്‍ ഉണ്ടാകുന്നതെന്ന് നടന്‍ ടൊവിനോ തോമസ്. പ്രതികരിച്ചതില്‍ എന്തെങ്കിലും പ്രത്യാഘാതം ഉണ്ടാകുമ്പോള്‍ അന്ന് പിന്തുണച്ചവര്‍ തന്നെ കല്ലെറിയുന്ന സാഹചര്യമാണ് ഉള്ളതെന്നും ടൊവിനോ പറഞ്ഞു. നീലവെളിച്ചം സിനിമയുടെ പ്രമോഷനുമായി ബന്ധപ്പെട്ട് ദുബായില്‍ വെച്ച് നടന്ന പ്രസ്മീറ്റിലാണ് ടൊവിനോയുടെ പ്രതികരണം.
പ്രതികരിച്ചതിന്റെ പേരില്‍ ആക്രമിക്കപ്പെടുമ്പോള്‍ നിങ്ങള്‍ എവിടെയാണ്? ഒരാളെ ആക്രമിക്കുമ്പോള്‍ അയാളെ ആക്രമിക്കുന്നത് എന്തിനാണ് എന്ന് ചോദിക്കാത്തത് എന്തുകൊണ്ടാണെന്നും ടൊവിനോ മാധ്യമ പ്രവര്‍ത്തകരോട് ചോദിച്ചു. അഭിപ്രായം പറഞ്ഞ് കൈയ്യടി വാങ്ങാന്‍ താത്പര്യമില്ലെന്നും ടൊവിനോ പറഞ്ഞു.
തന്റെ ഇന്‍സ്റ്റഗ്രാം, ഫേസ്ബുക്ക് പ്രൊഫൈലുകള്‍ ഒക്കെ നോക്കിയാല്‍ അറിയാം, പ്രതികരിച്ചതെല്ലാം അവിടെ തന്നെയുണ്ട്. മലയാള സിനിമയിലെ ഭൂരിഭാഗം പേരും അതൊക്കെ ചെയ്തിട്ടുണ്ട്. അതിനൊക്കെ പല പ്രത്യാഘാതാങ്ങള്‍ പല സൈഡില്‍ നിന്നും കിട്ടുമ്പോള്‍ പിന്തുണച്ചവര്‍ തന്നെ നമുക്ക് എതിരെ തിരിയുന്നത് കാണാം. ഒരു വാര്‍ത്ത വന്നുകഴിഞ്ഞ് അതില്‍ എല്ലാവരും പ്രതികരിക്കുന്നു. എന്നിട്ട് ആ വാര്‍ത്തയുടെ മറുവശം വന്നു കഴിഞ്ഞാല്‍ നിങ്ങള്‍ ഒക്കെ മറുകണ്ടം ചാടും. അഭിപ്രായം പറഞ്ഞ നമ്മള്‍ ഒക്കെ പ്രതിസ്ഥാനത്ത് വരികയും ചെയ്യും. സത്യാനന്തര കാലത്ത് രണ്ട് ദിവസം എടുത്ത് വിശകലനം ചെയ്ത് മാത്രമേ അഭിപ്രായം തന്നെ പറയാന്‍ സാധിക്കൂ എന്നും ടൊവിനോ കൂട്ടിച്ചേര്‍ത്തു.
ടൊവിനോയുടെ വാക്കുകള്‍
എന്നാല്‍ എല്ലാ ദിവസവും എഴുന്നേറ്റ് പ്രതികരിക്കാം. ഞാന്‍ പ്രതികരിച്ചതുകൊണ്ട് മാത്രം എന്ത് മാറ്റമാണ് ഉണ്ടാവാന്‍ പോകുന്നത്. ഞങ്ങള്‍ ആരാണ് ന്യായാധിപന്‍മാരാണോ? ഞാന്‍ ഒന്നിലും പ്രതികരിച്ചിട്ടില്ലേ? പ്രതികരിച്ചതിന്റെ പേരില്‍ ആക്രമിക്കപ്പെടുമ്പോള്‍ നിങ്ങള്‍ എവിടെയാണ്? ഒരാളെ ആക്രമിക്കുമ്പോള്‍ അയാളെ ആക്രമിക്കുന്നത് എന്തിനാണ് എന്ന് ചോദിക്കാത്തത് എന്തുകൊണ്ടാണ്?
കൈയ്യടി വാങ്ങാന്‍ വേണ്ടി എല്ലാ ദിവസവും പ്രതികരിക്കണം എന്ന് ഞാന്‍ കരുതുന്നില്ല. പക്ഷെ എന്റെ ഇന്‍സ്റ്റഗ്രാം, ഫേസ്ബുക്ക് പ്രൊഫൈലുകള്‍ ഒക്കെ നോക്കിയാല്‍ അറിയാം, പ്രതികരിച്ചതെല്ലാം അവിടെ തന്നെയുണ്ട്. ഞാന്‍ മാത്രമല്ല, മലയാള സിനിമയിലെ ഭൂരിഭാഗം പേരും അതൊക്കെ ചെയ്തിട്ടുണ്ട്. അതിനൊക്കെ പല പ്രത്യാഘാതാങ്ങള്‍ പല സൈഡില്‍ നിന്നും കിട്ടുമ്പോള്‍ പിന്തുണച്ചവര്‍ തന്നെ നമുക്ക് എതിരെ തിരിയുന്നത് കാണാം.
സിനിമയില്‍ നിന്നും പ്രധാനമായും എന്റര്‍ടെയിന്‍മെന്റ് മാത്രമേ നിങ്ങള്‍ പ്രതീക്ഷിക്കേണ്ടതുള്ളു. അതിനപ്പുറത്തേക്കുള്ളത് ഞങ്ങള്‍ ഞങ്ങളുടെ ഒരു കടമയുണ്ടല്ലോ, മോശമായുള്ള സന്ദേശം കൊടുക്കാതിരിക്കുക. അത്രയേ നമുക്ക് ചെയ്യേണ്ടതായിട്ടുള്ളു. ബാക്കി ഇന്‍ഫ്‌ളുവന്‍സേഴ്‌സ് എന്ന രീതിയിലാണ് ആരുടെയും ശ്രദ്ധയില്‍പെടാത്ത കാര്യങ്ങള്‍ മുന്നില്‍ കൊണ്ട് വരാന്‍ സാധിക്കുന്നത്. അതെല്ലാം കൃത്യമായി നടക്കുകയും ചെയ്യുന്നുണ്ട്. അതിനപ്പുറത്തേക്ക് ‘അവനെ തൂക്കിക്കൊല്ല്’ എന്നൊക്കെ പറഞ്ഞിട്ട് കൈയ്യടി വാങ്ങാന്‍ താത്പര്യമില്ല, അതുകൊണ്ട് ഇവിടെ ഒന്നും സംഭവിക്കാന്‍ പോകുന്നില്ല.
ഒരു വാര്‍ത്ത വന്നുകഴിഞ്ഞ് അതില്‍ എല്ലാവരും പ്രതികരിക്കുന്നു. എന്നിട്ട് ആ വാര്‍ത്തയുടെ മറുവശം വന്നു കഴിഞ്ഞാല്‍ നിങ്ങള്‍ ഒക്കെ മറുകണ്ടം ചാടും. അഭിപ്രായം പറഞ്ഞ നമ്മള്‍ ഒക്കെ പ്രതിസ്ഥാനത്ത് വരികയും ചെയ്യും. സത്യാനന്തര കാലത്ത് രണ്ട് ദിവസം എടുത്ത് വിശകലനം ചെയ്ത് മാത്രമേ അഭിപ്രായം തന്നെ പറയാന്‍ സാധിക്കൂ.
