കുവൈറ്റിൽ ജനാധിപത്യവും ഭരണഘടനയും രാജ്യത്തിന് സംഭാവന ചെയ്തതിന്റെ 60 ആം വാർഷികം ഇന്ന്. 1962 നവംബർ 11 നാണ് കുവൈറ്റിൽ ഭരണഘടന നിലവിൽ വന്നത്. 11 ആം അമീർ ഷെയ്ഖ് അബ്ദുള്ള അൽ സാലിം അസ്സബാഹാണ് ഭരണഘടന നിലവിൽ വരുന്നതിന് പിന്നിൽ പ്രവർത്തിച്ചത്. 1938 ൽ ഭരണഘടനാ രേഖയിലാണ് പ്രക്രിയ തുടങ്ങിയത്. ഇതിന്റെ തുടർച്ചയായി 1962 ൽ ഭരണഘടന രൂപീകരിച്ചു.
1961ഓഗസ്റ്റ് 26 ന് അമീർ ഷെയ്ഖ് അബ്ദുള്ള അൽ സാലിം ഭരണഘടന അസംബ്ലിയിലേക്ക് തിരഞ്ഞെടുപ്പ് നടത്താനുള്ള നിയമത്തിൽ ഒപ്പുവച്ചു. 1962 ൽ ഭരണഘടന നിലവിൽ വരുകയും ചെയ്തു. അബ്ദുൾ ലത്തീഫ് മുഹമ്മദ് അൽ ഗാനിമിനെ സ്പീക്കറായും ഡോ. അഹ്മദ് അൽ ഖത്തീബിനെ ഡെപ്യൂട്ടി സ്പീക്കറായും തെരഞ്ഞെടുത്തു. എന്നാൽ ഭരണഘടന അസംബ്ലി സമർപ്പിച്ച കരടിന് 1962 നവംബർ മൂന്നിനാണ് അംഗീകാരം ലഭിച്ചത്. 1963 ജനുവരിയിൽ ഭരണഘടന പ്രകാരമുള്ള ആദ്യ ദേശീയ അസംബ്ലി തെരഞ്ഞെടുപ്പിനും സാക്ഷിയായി. ഭരണഘടനയ്ക്ക് അംഗീകാരം ലഭിച്ചത് രാജ്യത്തിന്റെ രാഷ്ട്രീയ ചരിത്രത്തിലെ തന്നെ നിർണായക നിമിഷണങ്ങളിലൊന്നായി കണക്കാക്കപ്പെടുന്നു.
അഞ്ചു ഭാഗങ്ങളിലായി 182 അനുഛേദങ്ങൾ ഉൾക്കൊള്ളുന്നതാണ് കുവൈറ്റിന്റെ ഭരണഘടന. ഭരണകൂടത്തെക്കുറിച്ചും ഭരണ സംവിധാനത്തെക്കുറിച്ചുമാണ് ആദ്യത്തെ ഭാഗത്തിൽ പറയുന്നത്. രണ്ടാമത്തെതിൽ സമൂഹത്തിന്റെ അടിസ്ഥാന ഘടകങ്ങളെക്കുറിച്ചുമാണ് വിശദീകരിക്കുന്നത്. മൂന്നാമത്തെതിൽ പൊതു അവകാശങ്ങളെക്കുറിച്ചും കടമകളെക്കുറിച്ചും നാലാമത്തെതിൽ അധികാരികളെയും പരാമർശിക്കുന്നു. അഞ്ചാമത്തെതിൽ പൊതു വ്യവസ്ഥകളെക്കുറിച്ചും വിശദീകരിക്കുന്നു. ബാഹ്യവും ആഭ്യന്തരവുമായ പ്രതിസന്ധികളെ അഭിമുഖീകരിക്കാൻ കുവൈറ്റിനെ സഹായിച്ച പ്രധാന കവചമാണ് ഭരണഘടന. 1990 ൽ ഉണ്ടായ ഇറാഖ് അധിനിവേശ സമയത്ത് കുവൈറ്റിന്റെ അസ്തിത്വം നിലനിർത്താൻ ഭരണഘടന സഹായിച്ചു.