യുഎസിലെ ടെക്സസ് സംസ്ഥാനത്തുള്ള ഫോർട്ട് ബെൻഡ് കൗണ്ടിയിൽ മൂന്ന് മലയാളികൾ ജഡ്ജിമാരായി സ്ഥാനമേറ്റു. ജൂലി എ. മാത്യു, കെ.പി.ജോർജ്, സുരേന്ദ്രൻ കെ.പട്ടേൽ എന്നിവരാണ് സ്ഥാനമേറ്റത്. ജൂലിയും ജോർജും രണ്ടാം വട്ടമാണ് ജഡ്ജിമാരായി തിരഞ്ഞെടുക്കപ്പെടുന്നത്. തിരുവല്ല വെണ്ണിക്കുളം സ്വദേശിയായ ജൂലിയുടെ ശ്രമഫലമായാണു മാനസിക വെല്ലുവിളി നേരിടുന്ന കുട്ടികളുടെ പ്രശ്നപരിഹാരത്തിനായി കൗണ്ടിയിൽ പ്രത്യേക കോടതി ആരംഭിച്ചത്. 15 വർഷം അറ്റോർണിയായിരുന്നു ജൂലി.
കോന്നി കൊക്കാത്തോട് സ്വദേശിയാണ് കെ.പി.ജോർജ്. ഫിനാൻഷ്യൽ കൺസൾറ്റന്റായി പ്രവർത്തിച്ചിട്ടുണ്ട് ഇദ്ദേഹം. കാസർകോട് ബളാൽ സ്വദേശിയായ സുരേന്ദ്രൻ ടെക്സസിൽ 25 വർഷം അറ്റോർണിയായിരുന്നു. ഗ്രേറ്റർ ഹൂസ്റ്റൺ മലയാളി അസോസിയേഷൻ പ്രസിഡന്റായും സേവനമനുഷ്ഠിച്ചിട്ടുണ്ട്. നവംബറില്‍ നടന്ന തിരഞ്ഞെടുപ്പിൽ ഡെമോക്രാറ്റിക് പാർട്ടി സ്ഥാനാർഥികളായാണ് മൂന്ന് പേരും ജയിച്ചത്.
