ജോജു ജോര്‍ജിനെ നായകനാക്കി ‘ഇരട്ട’യെന്ന ചിത്രം സംവിധാനം ചെയ്ത രോഹിത് എംജി കൃഷ്ണന്‍ ബോളിവുഡിലേയ്ക്ക് ചുവട് വയ്ക്കാനൊരുങ്ങുന്നു. ഷാരൂഖ് ഖാന്റെ പ്രൊഡക്ഷന്‍ ഹൗസായ റെഡ് ചില്ലീസ് എന്റര്‍ടെയ്ന്‍മെന്റ്സാണ് ഒരു ചിത്രത്തിനായി രോഹിത്തിനെ സമീപിച്ചിരിക്കുന്നത്. അതേസമയം, അറ്റ്ലീ സംവിധാനം ചെയ്യുന്ന ബോളിവുഡ് ചിത്രം ‘ജവാന്റെ’ ചിത്രീകരണ തിരക്കിലാണ് ഷാരൂഖ് ഇപ്പോള്‍. മാര്‍ച്ചില്‍ സിനിമയുടെ ചിത്രീകരണം പൂര്‍ത്തിയാകുമെന്നാണ് സൂചന.
റെഡ് ചില്ലീസ് എന്റര്‍ടെയ്ന്‍മെന്റിന്‍ നിന്ന് തിരക്കഥയെഴുതാന്‍ ഓഫര്‍ വന്നുവെന്ന് രോഹിത് തന്നെയാണ് അറിയിച്ചത്. ഇപ്പോൾ ആ തിരക്കഥയുടെ പണിപ്പുരയിലാണ് രോഹിത്. ഇതൊരു ബോളിവുഡ് ചിത്രമായിരിക്കുമെന്നും ഇരട്ടയുടെ റീമേക്ക്‌ അല്ലെന്നും രോഹിത് കൂട്ടിച്ചേർത്തു. എന്നാൽ പുതിയ ചിത്രത്തെക്കുറിച്ച് കൂടുതലൊന്നും വിശദമാക്കാന്‍ സാധിക്കില്ലെന്നും സംവിധായകൻ പറഞ്ഞു. ഇരട്ട തിയേറ്ററില്‍ അധികം ആളുകള്‍ കണ്ടിരുന്നില്ല. അതേസമയം നെറ്റ്ഫ്ളിക്സിലൂടെ ധാരാളം പേരിലേയ്ക്ക് ചിത്രം എത്തിയെന്നും സംവിധായകന്‍ ചൂണ്ടിക്കാട്ടി.
ജോജു ജോര്‍ജ്ജ് ആദ്യമായി ഡബിൾ റോളിലെത്തിയ ചിത്രമാണ് ‘ഇരട്ട’. ജോജു ജോര്‍ജിന്റെ ഉടമസ്ഥതയിലുള്ള അപ്പു പാത്തു പാപ്പു പ്രൊഡക്ഷന്‍സും മാര്‍ട്ടിന്‍ പ്രക്കാട്ട് ഫിലിംസും സിജോ വടക്കനും ചേര്‍ന്നാണ് ചിത്രം നിര്‍മിച്ചിരിക്കുന്നത്. ശ്രീന്ദ, ശ്രീകാന്ത് മുരളി, ആര്യ സലിം, സാബുമോന്‍, അഭിരാം എന്നിവരും ചിത്രത്തിൽ പ്രധാന കഥാപാത്രങ്ങളെ അവതരിപ്പിച്ചിട്ടുണ്ട്.
