മാധ്യമപ്രവര്‍ത്തകയോട് അപമര്യാദയായി പെരുമാറിയ സംഭവത്തെക്കുറിച്ച് ചോദിച്ചതിന് റിപ്പോര്‍ട്ടര്‍ ടിവിയിലെ മാധ്യമപ്രവര്‍ത്തകയോട് കയര്‍ത്ത് നടനും ബിജെപി നേതാവുമായ സുരേഷ് ഗോപി. മാധ്യമപ്രവര്‍ത്തകയോട് ഇറങ്ങിപോയാല്‍ മാത്രമേ മറ്റു മാധ്യമങ്ങളോട് സംസാരിക്കൂ എന്നും സുരേഷ് ഗോപി പറഞ്ഞു.
സ്ത്രീകള്‍ക്ക് മാത്രമായി നടത്തിയ സിനിമാ പ്രദര്‍ശനത്തില്‍ തൃശൂര്‍ ഗിരിജ തിയേറ്ററില്‍ എത്തിയതായിരുന്നു സുരേഷ് ഗോപി. തുടര്‍ന്ന് മാധ്യമങ്ങളോട് സംസാരിക്കവെയാണ് സുരേഷ് ഗോപി മാധ്യമപ്രവര്‍ത്തകയോട് കയര്‍ത്ത് സംസാരിച്ചത്.
എന്റെ അടുത്ത് ആളാവാന്‍ വരരുത്. ആളാകാന്‍ വരുന്നതല്ല എന്ന് എന്ന് മാധ്യമപ്രവര്‍ത്തക ആ സമയങ്ങളില്‍ പറയുന്നുമുണ്ട്.
മാധ്യമപ്രവര്‍ത്തകരോട് സംസാരിക്കുമ്പോള്‍ അടുത്തുള്ള മാധ്യമപ്രവര്‍ത്തകനോട് തോളില്‍ കൈ വെക്കാമല്ലോ അല്ലേ എന്ന് സുരേഷ് ഗോപി ചോദിക്കുന്നുണ്ട്. തുടര്‍ന്നാണ് മുന്നില്‍ നില്‍ക്കുന്ന മാധ്യമപ്രവര്‍ത്തകയോട് പേടിയാണ് അടുത്ത് വരുമ്പോള്‍ എന്നും സുരേഷ് ഗോപി പറഞ്ഞു.
ഇതിന് മറുപടിയായി മാധ്യമപ്രവര്‍ത്തക പറയുന്നുണ്ട്. താങ്കള്‍ ചെയ്ത ഒരു തെറ്റാണ്. അതിന് മറ്റുള്ളവരെ കാണുമ്പോഴും നോ ബോഡി ടച്ചിംഗ് എന്ന് പറയേണ്ട കാര്യമെന്താണ്? താങ്കള്‍ അത് വളച്ചൊടിച്ചുകൊണ്ടിരിക്കു്കയാണ്. ഞാന്‍ ഒരു സ്ത്രീയാണ് ഇതുപോലൊരു സംഭവം ഉണ്ടാകുമ്പോള്‍ ഒരു സ്ത്രീയെന്ന നിലയില്‍ എനിക്ക് അതിന്റെ വിഷമം മനസിലാകും. തെറ്റ് അംഗീകരിച്ച് മാപ്പ് പറയുകയല്ലേ വേണ്ടത് എന്ന് മാധ്യമപ്രവര്‍ത്തക ചോദിക്കുന്നു.
അപ്പോള്‍ മാപ്പ് പറഞ്ഞിട്ടുണ്ടെന്ന് സുരേഷ് ഗോപി മറുപടി പറഞ്ഞു. എന്നാല്‍ അവര്‍ക്ക് മോശമായി തോന്നിയെങ്കില്‍ മാപ്പ് എന്നല്ല, അതില്‍ തെറ്റ് മനസിലാക്കിയാണ് മാപ്പ് പറയേണ്ടതെന്ന് മാധ്യമപ്രവര്‍ത്ത ചൂണ്ടിക്കാണിക്കുമ്പോഴാണ് ആളാവാന്‍ വരരുത് എന്ന് സുരേഷ് ഗോപി ആക്രോശിക്കുന്നത്.
താന്‍ ആളാവാന്‍ വരുന്നതല്ലെന്നും മാധ്യമപ്രവര്‍ത്തക പറയുന്നു.
എന്നാല്‍ ആളാവാന്‍ വരരുത്. കോടതിയാണ് നോക്കുന്നത്. അത് അവര് നോക്കിക്കോളും എന്ത് കോടതി എന്നോ, റിപ്പോര്‍ട്ടര്‍ ചാനലിന്റെ വക്താവ് വന്ന് എന്ത് കോടതി എന്നാണ് ചോദിക്കുന്നത്. ഞാന്‍ സംസാരിക്കുന്നത് തുടരണമെങ്കില്‍ ഇവരോട് പോകാന്‍ പറയൂ എന്നും സുരേഷ് ഗോപി പറഞ്ഞു.
പ്രേക്ഷകര്‍ സിനിമ ആസ്വദിക്കുന്നു. അതെനിക്ക് ഈശ്വാരനുഗ്രഹം തന്നെയാണ്. ആ ഈശ്വരാനുഗ്രഹം താന്‍ സന്തോഷപൂര്‍വം അനുഭവിച്ചുകൊണ്ടിരിക്കുകയാണ്. ഇപ്പോഴും ഞാനൊന്നും പറഞ്ഞിട്ടില്ല. എനിക്ക് പേടിയാണ്. മാറിനില്‍ക്കണമെന്നേ ഞാന്‍ പറഞ്ഞിട്ടുള്ളൂ. അതിനുള്ള അവകാശം എനിക്കില്ലേ. അതിന് വാര്‍ത്താ കച്ചവടക്കാരന്‍ ക്ലാസെടുത്തു വിട്ടിരിക്കുന്ന വാചകങ്ങളൊന്നും ഇവിടെ എഴുന്നള്ളിക്കരുത്. കോടതിയെയാണ് പുച്ഛിച്ചിരിക്കുന്നത്. ഞാനാ കോടതിയെ ബഹുമാനിച്ചാണ് കാത്തിരിക്കുന്നത്. ‘എന്തു കോടതി’ നിങ്ങളില്‍ ആര്‍ക്കെങ്കിലും പറയാന്‍ അവകാശമുണ്ടോ? എന്താ ഒന്നും മറുപടി പറയാത്തത്. അതൊക്കെ വേറെ വിഷയങ്ങളാണ്. അതിനകത്ത് രാഷ്ട്രീയവും കാര്യങ്ങളൊന്നും ഉന്നയിക്കരുത്.എന്റെയും സിനിമ ഇന്‍ഡസ്ട്രിയുടെയും ബലത്തില്‍ ഗരുഡന്‍ പറന്നുയരുകയാണ്. അത് നാടാകെ ആഘോഷിക്കുമ്പോള്‍ ഞാനും ആ ആഘോഷത്തില്‍ പങ്കെടുക്കുന്നുണ്ട് എന്നും സുരേഷ് ഗോപി പറഞ്ഞു.
