ടൈറ്റന് സമുദ്രപേടകം കാണാതായ ഭാഗത്ത് നിന്ന് അന്ന് തന്നെ തകരുന്നതിന് സമാനമായ ശബ്ദം കേട്ടിരുന്നതായി യുഎസ് നേവി. സമുദ്ര പേടകവുമായി ബന്ധം വിച്ഛേദിക്കപ്പെട്ടതിന് പിന്നാലെയാണ് പൊട്ടിത്തെറിയുടെ ശബ്ദം കേട്ടതെന്ന് യു.എസ് കോസ്റ്റ്ഗാര്ഡിന് യു.എസ് നേവി നല്കിയ റിപ്പോര്ട്ടി പറയുന്നു. എന്നാല് വിവരം സ്ഥിരീകരിക്കപ്പെട്ടിട്ടില്ല.
എന്നാല് തുടര്ന്നും രക്ഷാപ്രവര്ത്തനം നടത്തുകയായിരുന്നുവെന്ന് യു.എസ് നേവി ഉദ്യോഗസ്ഥന് പറഞ്ഞു. ആളുകളെ രക്ഷപ്പെടുത്തുക എന്നതായിരുന്നു ഉദ്ദേശ്യമെന്നും അദ്ദേഹം പറഞ്ഞു.
അഞ്ച് ദിവസങ്ങളായുള്ള തെരച്ചിലിന് പിന്നാലെ ടൈറ്റാനിക് കപ്പലിന്റെ അവശിഷ്ടങ്ങള്ക്ക് സമീപം സമുദ്ര പേടകത്തിന്റേതെന്ന് സംശയിക്കുന്ന അവശിഷ്ടങ്ങള് കണ്ടെത്തിയിരുന്നു. ഇതിന് പിന്നാലെ വാഹനം തകര്ന്നതായും യാത്രക്കാര് മരിച്ചതായും ഓഷ്യന് ഗേറ്റ് കമ്പനി ഔദ്യോഗികമായി പ്രസ്താവനയിറക്കി.
ടൈറ്റാനിക്കില് നിന്ന് 1600 അടി അകലെയാണ് പേടകത്തിന്റെ അവശിഷ്ടങ്ങള് കണ്ടെത്തിയതെന്നും കോസ്റ്റ്ഗാര്ഡ് അറിയിച്ചു. മരിച്ചവരുടെ കുടുംബാംഗങ്ങളെ വിവരം അറിയിച്ചു. യാത്രക്കാരുടെ മരണത്തില് അതീവ ദുഃഖം രേഖപ്പെടുത്തുന്നതായും കോസ്റ്റ്ഗാര്ഡ് അറിയിച്ചു.
മൃതദേഹം കണ്ടെത്തുകയെന്നത് ദുഷ്കരമായ ഒന്നാണെന്നും കണ്ടെത്താനുള്ള ശ്രമം തുടരുന്നതായും അധികൃതര് അറിയിച്ചിരുന്നു.
കമ്പനി സിഇഒ സ്റ്റോക്റ്റണ് റഷ്, യാത്രക്കാരായ ഷഹ്സാദ ദാവൂദ്, മകന് സുലേമാന് ദാവൂദ്, ഹാമിഷ് ഹാര്ഡിംഗ്, പോള് ഹെന്റി നാര്സലെ എന്നിവരെ നഷ്ടപ്പെട്ടതായി ഓഷ്യന് ഗേറ്റ് പുറത്തിറക്കിയ പ്രസ്താവനയില് പറയുന്നു. ജൂണ് 20 മുതല് സമുദ്രാന്തര് ഭാഗത്ത് തെരച്ചില് വ്യാപകമാക്കിയിരുന്നു. കഴിഞ്ഞ ദിവസം നടന്ന തെരച്ചിലിനൊടുവിലാണ് ടൈറ്റാനികിന്റെ തകര്ന്ന അവശിഷ്ടങ്ങള്ക്ക് സമീപത്ത് നിന്ന് മറ്റൊരു പേടകത്തിന്റെ അവശിഷ്ടം കൂടി കണ്ടെത്തിയത്.