മണ്ണാര്ക്കാട് കോട്ടോപ്പാടത്ത് കുളത്തില് കുളിക്കാനിറങ്ങിയ മൂന്ന് സഹോദരിമാര് മുങ്ങി മരിച്ചു. ഭീമനാട് സ്വദേശിനികളായ റമീഷ് (23 വയസ്), റിന്ഷി (18 വയസ്), നാഷിദ (26 വയസ്) എന്നിവരാണ് മരിച്ചത്. സഹോദരിമാരില് ഒരാള് കുളത്തില് തെന്നി വീണപ്പോള് മറ്റുള്ളവര് രക്ഷിക്കാന് ശ്രമിക്കവേ ആയിരുന്നു അപകടം.
മൂവരും പിതാവിനൊപ്പമാണ് കുളക്കടവിലേക്ക് പോയത്. അലക്കുന്നതിനും കുളിക്കുന്നതിനുമായാണ് പോയത്. പിതാവ് തുണി അലക്കുന്നതിനിടെയാണ് അപകടം നടക്കുന്നത്. പിതാവിന്റെ കണ്മുന്നില് വെച്ചാണ് മൂവരും മുങ്ങി മരിച്ചത്.
കുട്ടികള് അപകടത്തില്പ്പെടുന്നത് കണ്ട് അതുവഴി പോയ അതിഥി തൊഴിലാളികള് നാട്ടുകാരെ വിവരം അറിയിക്കുകയായിരുന്നു. കുട്ടികളെ കുളത്തില് നിന്ന് പുറത്തെടുത്ത് ആശുപത്രിയില് എത്തിച്ചെങ്കിലും ജീവന് രക്ഷിക്കാനായില്ല.
ഓണത്തിനായി വിരുന്നിന് എത്തിയതായിരുന്നു സഹോദരങ്ങള്.