സോളാര് കേസില് മുന് മുഖ്യമന്ത്രി ഉമ്മന്ചാണ്ടിക്കെതിരെ ഗൂഢാലോചന നടത്തിയെന്ന സിബിഐ റിപ്പോര്ട്ടിന്റെ അടിസ്ഥാനത്തില് കെ ബി ഗണേഷ് കുമാര് എംഎല്എയ്ക്കെതിരെ കേസെടുക്കണമെന്ന് ഷാഫി പറമ്പില് എംഎല്എ. സിബിഐയുടെ കണ്ടെത്തല് ഏറെ ഗൗരവമുള്ളതാണ്. ഗണേഷിന്റെ രാഷ്ട്രീയ ജീവിതം ഉമ്മന്ചാണ്ടിയുടെ ഔദാര്യമാണെന്നും ഷാഫി പറമ്പില് പറഞ്ഞു.
ഗണേഷ് കുമാര് യുഡിഎഫില് കണ്ണുവെക്കുന്നുണ്ട്. ഒരു കാരണവശാലും അടുപ്പിക്കരുത്. ഗണേഷിനെതിരെ തുറന്ന സമരത്തിലേക്ക് തന്നെ യുഡിഎഫ് നീങ്ങുമെന്നും ഷാഫി പറമ്പില് മാധ്യമങ്ങളോട് പറഞ്ഞു.
‘ഗണേഷ് കുമാറിന്റെ പൊതു ജീവിതം തന്നെ ഉമ്മന്ചാണ്ടി എന്ന മനുഷ്യന്റെ ഔദാര്യമാണെന്ന് എല്ലാവര്ക്കും അറിയാം. കൂടെ നിന്ന് ഒറ്റിയതിന്റെ ചരിത്രമാണ് അദ്ദേഹം എഴുതി ചേര്ത്തിരിക്കുന്നത്. ഇപ്പോള് മന്ത്രി സ്ഥാനം കിട്ടുമോ ഇല്ലയോ എന്ന ആശങ്കയില് കൈയ്യടിക്ക് വേണ്ടി ഇടതുപക്ഷത്തിനെതിരെ പറയുന്ന ഒന്നുരണ്ട് വാചകങ്ങള്ക്ക് അപ്പുറത്തേക്ക് യുഡിഎഫിലേക്ക് ഒരു കണ്ണെറിയാനാണ് ഗണേഷ് കുമാറിന്റെ ഭാവമെങ്കില്, അതിന് ഏതെങ്കിലും നേതാവ് കാതോ കണ്ണോ കൊടുക്കുന്നുണ്ടെങ്കില് അത് നടത്തിക്കില്ല എന്ന് ആര്ജവത്തോടെ യൂത്ത് കോണ്ഗ്രസ് പറയാന് ആഗ്രഹിക്കുകയാണ്. ഗണേഷ്കുമാറിനെതിരെ നടപടികള് ആവശ്യപ്പെട്ടുകൊണ്ട് യൂത്ത് കോണ്ഗ്രസ് സമരപരിപാടികള് നേതൃത്വം നല്കും,’ഷാഫി പറമ്പില് പറഞ്ഞു.