യുവ നടൻ ടൊവിനോ തോമസിന്റെ ജന്മദിനമാണിന്ന്. ആഷിഖ് അബുവിന്റെ സംവിധാനത്തിൽ ഒരുങ്ങുന്ന നീലവെളിച്ചമാണ് ടൊവിനോയുടെ ഏറ്റവും പുതിയ ചിത്രം. പ്രശസ്‌ത എഴുത്തുക്കാരൻ വൈക്കം മുഹമ്മദ് ബഷീറിന്റെ ചെറുകഥയെ അടിസ്ഥാനമാക്കിയാണ് നീലവെളിച്ചം ഒരുങ്ങുന്നത്. ചിത്രത്തിൽ ബഷീറിന്റെ വേഷം ചെയ്യുന്നതും ടൊവിനോ തന്നെയാണ്. കൗതുകമെന്തെന്നാൽ ബഷീറിന്റെയും ജന്മദിനമാണിന്ന്. നീലവെളിച്ചത്തിന്റെ യഥാർത്ഥ എഴുത്തുകാരന്റെയും ചിത്രത്തിലെ നായകന്റെയും പിറന്നാൾ ഒരേ ദിവസം തന്നെ വന്നതിന്റെ കൗതുകത്തിലാണ് എല്ലാവരും.
അതേസമയം ചിത്രത്തിലെ ടൊവിനോയുടെ ഫസ്റ്റ് ലുക്ക് പോസ്റ്ററും അണിയറപ്രവർത്തകർ പുറത്തുവിട്ടിട്ടുണ്ട്. ബഷീറായി ടോവിനോയുടെ മേക്കോവർ വീഡിയോയും പങ്കുവച്ചിട്ടുണ്ട്. ഇന്ന് ജന്മദിനമാണ്. എനിക്ക് മംഗളം ആശംസിച്ചിട്ടു പോകുവിൻ!- വൈക്കം മുഹമ്മദ് ബഷീർ (ജന്മദിനം) .നീലവെളിച്ചത്തിന്റെ നായകന് ജന്മദിനാശംസകൾ എന്നാണ് ചിത്രത്തിന്റെ സംവിധായകനായ ആഷിഖ് അബു പോസ്റ്റർ പങ്കുവച്ചുകൊണ്ട് സമൂഹമാധ്യമത്തിൽ കുറിച്ചത്.
ബഷീർ ജനിച്ച സ്ഥലത്ത് തന്നെ ജനിച്ച സുന്ദരനായ മമ്മൂക്ക ആദ്യം ബഷീറിനെ സ്ക്രീനിൽ അനശ്വരനാക്കി. ഇപ്പോഴിതാ ബഷീർ ജനിച്ച ദിവസം തന്നെ ജനിച്ച മറ്റൊരു പ്രിയ നടനിലേക്ക്‌ കറങ്ങിത്തിരിഞ്ഞ്‌ അദ്ദേഹത്തിന്റെ മറ്റൊരു കഥാപാത്രവും വന്നിരിക്കുന്നു. നല്ല ശേലിൽ കറങ്ങുന്നുണ്ട്‌ ഭൂമി. ബഷീറിനും ടോവിക്കും ജന്മദിനമംഗളങ്ങൾ നേരുന്നു. താരതമ്യങ്ങളേ ഇല്ലാത്ത രണ്ട്‌ പേർ രണ്ട്‌ ലോകങ്ങളിലിരുന്ന് ഒരേ വെളിച്ചം തട്ടി തിളങ്ങുകയാണിന്ന് യാ ഇലാഹീ..എന്നാണ് ഗായകൻ ഷഹബാസ് അമൻ കുറിച്ചത്.
റിമ കല്ലിങ്കലാണ് ചിത്രത്തിലെ നായിക. കഴിഞ്ഞ ദിവസം ചിത്രത്തിലെ ഒരു വീഡിയോ സോങ്ങ് പുറത്തിറങ്ങിയിരുന്നു. കെ എസ് ചിത്രയുടെ സ്വരമാധുര്യത്തിൽ ഒരുങ്ങിയ അനുരാഗ മധുചഷകം എന്ന ഗാനം ഇതിനോടകം തന്നെ ഹിറ്റ് ലിസ്റ്റിൽ ഇടം നേടിയിട്ടുണ്ട്. ഒപിഎം സിനിമാസാണ് ചിത്രം നിർമ്മിക്കുന്നത്. ഏപ്രിൽ 21 നാണ് റിലീസ്. ഷൈൻ ടോം ചാക്കോ, റോഷൻ മാത്യു, രാജേഷ് മാധവൻ, ഉമ കെ പി, പൂജ മോഹൻരാജ്, ദേവകി ഭാഗി എന്നിവരാണ് മറ്റ് പ്രധാന കഥാപാത്രങ്ങളെ അവതരിപ്പിക്കുന്നത്.
