ഒഡീഷയിലെ ബാലസോറില് ട്രെയിനുകള് കൂട്ടിയിടിച്ചുണ്ടായ അപകടത്തിന്റെ കാരണം കണ്ടെത്തിയതായി സ്ഥലം സന്ദര്ശിച്ച റെയില്വേ മന്ത്രി അശ്വിനി വൈഷ്ണവ്. ട്രാക്ക് പുനഃസ്ഥാപിക്കാനുള്ള ശ്രമങ്ങള് നടക്കുകയാണെന്നും മന്ത്രി അറിയിച്ചു.
‘അപകടത്തിന്റെ മൂലകാരണം കണ്ടുപിടിച്ചിട്ടുണ്ട്. പ്രധാനമന്ത്രി സ്ഥലത്തെത്തി കാര്യങ്ങള് നിരീക്ഷിച്ചു. ഇന്ന് തന്നെ ട്രാക്കുകള് പുനഃസ്ഥാപിക്കാനുള്ള നീക്കങ്ങള് നടത്തുന്നുണ്ട്. എല്ലാ മൃതദേഹങ്ങളും മാറ്റിയിട്ടുണ്ട്. ബുധനാഴ്ചയോടെ അറ്റകുറ്റപണികള് തീര്ക്കാനുള്ള ശ്രമത്തിലാണ്. അങ്ങനെ നടന്നാല് ട്രെയിന് ഗതാഗതം ഉടന് പുനഃസ്ഥാപിക്കാന് സാധിക്കും,’മന്ത്രി അശ്വിനി വൈഷ്ണവ് പറഞ്ഞു.
തെറ്റായ പോയിന്റിംഗ് മൂലമാണ് ട്രെയിന് മെയിന് ലൈനില് നിന്ന് ലൂപ്പ് ലൈനിലേക്ക് നീങ്ങിയതെന്ന് സൂചനയുണ്ട്. ഇക്കാര്യം ചൂണ്ടിക്കാട്ടി ഇന്സ്പക്ഷന് റിപ്പോര്ട്ട് സമര്പ്പിച്ചിട്ടുണ്ട്.
ആയിരത്തിലേറെ തൊഴിലാളികള് ആണ് ശ്രമിച്ചു കൊണ്ടിരിക്കുന്നത്. മറിഞ്ഞ 21 കോച്ചുകളും ഉയര്ത്തിയിട്ടുണ്ട്. നിലവില് 288 പേരുടെ മരണമാണ് സ്ഥിരീകരിച്ചതെങ്കിലും മരണ സംഖ്യ അതിലും ഉയരെയാണെന്ന് സംശയമുണ്ടെന്ന് രക്ഷാ പ്രവര്ത്തനത്തിനെത്തിയ നാട്ടുകാര് പറഞ്ഞു. 1000ത്തിലേറെ പേര്ക്ക് പരിക്കേല്ക്കുകയും ചെയ്തിട്ടുണ്ട്. അന്വേഷണം യുദ്ധകാല അടിസ്ഥാനത്തില് പൂര്ത്തിയാക്കുമെന്ന് മന്ത്രി അറിയിച്ചു.
അതേസമയം മന്ത്രി അശ്വിനി വൈഷ്ണവിന്റെ രാജി പ്രതിപക്ഷം ആവശ്യപ്പെട്ടിട്ടുണ്ട്. ട്രെയിന് അപകടം നടന്ന സ്ഥലത്തെ ബോഗികള് പാളത്തില് നിന്ന് നീക്കിത്തുടങ്ങി. ഇന്ന് വൈകുന്നേരത്തോടെ ഒരു ലൈനില് മാത്രം ഗതാഗതം തുടങ്ങാനുള്ള നടപടികളും സ്വീകരിച്ചുവരികയാണ്.