മെറ്റ അവതരിപ്പിച്ച പുതിയ മൈക്രോ ബ്ലോഗിംഗ് ആപ്പായ ത്രെഡ്ഡിൽ അംഗത്വമെടുത്തവർക്ക് തിരിച്ചു പോകാൻ അവസരമില്ലെന്ന് പരാതി. ത്രെഡ്സ് ആപ്പിൽ ഒരിക്കൽ സൈൻ അപ്പ് ചെയ്തവർക്ക് പിന്നീട് അക്കൌണ്ട് ഡിലീറ്റ് ചെയ്യാൻ അവസരമുണ്ടാകില്ല. ത്രെഡ്സ് അക്കൌണ്ട് ഡിലീറ്റ് ചെയ്താൽ ഇൻസ്റ്റാഗ്രാം അക്കൌണ്ടും നഷ്ടപ്പെടുന്ന തരത്തിലാണ് ഈ മൈക്രോ ബ്ലോഗിംഗ് സൈറ്റിൻ്റെ ഘടന. ഇതിനെതിരെ സമൂഹമാധ്യമങ്ങളിൽ വലിയ വിമർശനമാണ് ഉയരുന്നത്.
ട്വിറ്ററിന് ബദലായിട്ടാണ് ഫേസ്ബുക്ക്, ഇൻസ്റ്റാഗ്രാം, വാട്സാപ്പ് എന്നീ ജനപ്രിയ സോഷ്യൽമീഡിയ/ചാറ്റ് ആപ്പുകളുടെ മാതൃകമ്പനിയായ മെറ്റ ത്രെഡ്സ് അവതരിപ്പിച്ചത്. ഇലോണ് മസ്ക് ഏറ്റെടുത്ത ശേഷം ട്വിറ്ററിൻ്റെ ജനപ്രീതിയിൽ ഇടിവുണ്ടായ സാഹചര്യത്തിലാണ് ത്രെഡ്സ് എന്ന മൈക്രോ ബ്ലോഗിംഗ് സൈറ്റ് മെറ്റ അവതരിപ്പിച്ചത്.
ജൂലൈ അഞ്ചിന് അവതരിപ്പിക്കപ്പെട്ട ത്രെഡ്സ് ഇതിനോടകം മൂന്ന് കോടി ആളുകൾ ഉപയോഗിക്കുന്നുണ്ട്. ഇത്രയും ചുരുങ്ങിയ സമയത്തിനകം ഇത്രയേറെ പേർ ഇൻസ്റ്റാൾ ചെയ്ത ആദ്യ ആപ്പ് എന്ന റെക്കോർഡും ഇതോടെ ത്രെഡ്സ് സ്വന്തമാക്കി. എന്നാൽ ഒരു ആവേശത്തിന് അക്കൌണ്ട് എടുത്ത പലരും ത്രെഡ്സിൻ്റെ നിയമാവലി പോലും പരിശോധിക്കാതെയാണ് സൈൻ അപ്പ് ചെയ്തത്. അതേസമയം അക്കൗണ്ട് ഡിലീറ്റ് ചെയ്യാൻ സാധിക്കില്ലെങ്കിലും ഡീ ആക്ടീവേറ്റ് ചെയ്യാനുള്ള അവസരം ത്രെഡ്സിൽ നൽകുന്നുണ്ട്.