കോഴിക്കോട്: ഇഫ്താർ – വിഷു ആഘോഷവുമായി തിരുവണ്ണൂർ നിവാസികളുടെ കൂട്ടായ്മ. കോഴിക്കോട് നഗരത്തിലെ തിരുവണ്ണൂർ പ്രദേശത്തെ ജനങ്ങളാണ് ഇഫ്താറും വിഷുവും ജനകീയമായി ആഘോഷിക്കുന്നത്. ചന്ദ്രസൂര്യോത്സവം എന്ന പേരിട്ടിരിക്കുന്ന പരിപാടിയിൽ കോഴിക്കോട് നഗരത്തിലെ പ്രമുഖരും അതിഥികളായി എത്തും.
തിരുവണ്ണൂർ നടക്കൽ കോർപ്പറേഷൻ ഗ്രൗണ്ടിൽ ഏപ്രിൽ ഏഴ് ഞായറാഴ്ച വൈകിട്ട് ഇഫ്താർ സംഘടിപ്പിച്ചു കൊണ്ടാണ് ചന്ദ്രസൂര്യോത്സവത്തിൻ്റെ ഒന്നാം ഭാഗം. തിരുവണ്ണൂർ നടയ്ക്കൽ ആൽ തറക്കലിൽ വിഷുദിനത്തിൽ പുലർച്ചെ 5മണിക്ക് നാട്ടു വിഷുക്കണിയൊരുക്കുന്നതോടെ പരിപാടികൾ ചന്ദ്രസൂര്യോത്സവം സമാപിക്കും.
തിരുവണ്ണൂർ പൈതൃക ഗ്രാമത്തിനായി മുന്നിട്ടിറങ്ങിയ തിരുവണ്ണൂർ ജനകീയ കൂട്ടായ്മയാണ് ചന്ദ്രസൂര്യോത്സവം പരിപാടിക്ക് പിന്നിൽ. ജാതിമത ഭേദ്യമില്ലാതെ തിരുവണ്ണൂരിലേയും പരിസര പ്രദേശങ്ങളിലേയും മുഴുവൻ ജനങ്ങളും മുന്നിട്ടിറങ്ങിയാണ് ഇങ്ങനെ വ്യത്യസ്തമായൊരു പരിപാടി സംഘടിപ്പിക്കുന്നതെന്ന് ഭാരവാഹികൾ വാർത്താ സമ്മേളനത്തിൽ പറഞ്ഞു.
തിരുവണ്ണൂർ സ്വദേശിയും ചലച്ചിത്ര നാടക-സാംസ്കാരിക പ്രവർത്തകനുമായ മോൻ ടെൻ മുന്നോട്ട് വച്ച ആശയമാണ് ജനകീയ കൂട്ടായ്മ ഏറ്റെടുത്ത് യഥാർത്ഥ്യമാക്കുന്നത്. പത്മശ്രീ കൈതപ്രം ദാമോദരൻ നമ്പൂതിരി, കോഴിക്കോട് കോർപ്പറേഷൻ മേയർ ഡോ.ബീന ഫിലിപ്പ്, എം.എൽ.എമാർ, എം.പി, ചലച്ചിത്ര പ്രവർത്തകർ, സാംസ്കാരിക – രാഷ്ട്രീയ – പൊതുപ്രവർത്തന – വ്യവസായിക മേഖലകളിലെ പ്രമുഖർ ചടങ്ങിൽ പങ്കെടുക്കുന്നുണ്ട്.
മോൻടെൻ തിരുവണ്ണൂരാണ് ചന്ദ്രസൂര്യത്സോവം സംഘാടക സമിതിയുടെ ചെയർമാൻ. ഭാരവാഹികളായ എൻ.പി മൻസൂർ, നിസാർ അർഷാദ്, ജിനിഷ് അബ്ദുള്ള, മനോജ് ബാബു, സുമിത്ത് ലാൽ, ഫനീഫ വാഴയിൽ വാർത്താ സമ്മേളനത്തിൽ പങ്കെടുത്തു.