പ്രജേഷ് സെൻ സംവിധാനം ചെയ്ത് 2021 ൽ പുറത്തിറങ്ങിയ ‘വെള്ളം ‘ എന്ന സിനിമയിലെ യഥാര്‍ത്ഥ കഥാപാത്രമായ വാട്ടർമാൻ മുരളി നിർമിക്കുന്ന ആദ്യ ചിത്രം ‘നദികളില്‍ സുന്ദരി യമുന’ എന്ന സിനിമയുടെ മോഷന്‍ പോസ്റ്റര്‍ പുറത്ത് വിട്ടു. നവാഗതരായ വിജേഷ് പാണത്തൂര്‍, ഉണ്ണി വെള്ളാറ എന്നിവരാണ് ചിത്രത്തിന്റെ തിരക്കഥയും രചനയും സംവിധാനവും നിർവഹിച്ചിരിക്കുന്നത്.
മുഴുവനായും കോമഡി എന്റർടൈൻമെന്റ് ചിത്രമായിരിക്കും എന്നത് മോഷന്‍ പോസ്റ്ററിലൂടെ വ്യക്തമാണ്. അജു വര്‍ഗീസും ധ്യാനും നേര്‍ക്ക് നേര്‍ വരുന്ന പോസ്റ്റര്‍ ആദ്യ കാഴ്ചയില്‍ തന്നെ ചിരി പടർത്തുന്നുണ്ട്. കണ്ണൂരിലെ നാട്ടുമ്പുറത്തുള്ള സാധാരണക്കാരായ മനുഷ്യരും കണ്ണന്‍, വിദ്യാധരന്‍, എന്നീ രണ്ട് യുവാക്കളുടെ ജീവിതവുമാണ് ചിത്രം പറയുന്നത്. സിനിമാറ്റിക്കയുടെ ബാനറില്‍ വിലാസ് കുമാര്‍, സിമി മുരളി എന്നിവർ ചേർന്നാണ് ചിത്രം നിര്‍മ്മിക്കുന്നത്.
സിനിമാറ്റിക് ഫിലിംസ് എല്‍എല്‍.പി.യുടെ ബാനറില്‍ വിലാസ് കുമാര്‍, സിമി മുരളി എന്നിവരാണ് ഈ ചിത്രം നിര്‍മ്മിക്കുന്നത്. സുധീഷ്, നിര്‍മ്മല്‍ പാലാഴി, ദേവരാജ് കോഴിക്കോട്, കലാഭവന്‍ ഷാജോണ്‍, പാര്‍വ്വണ, നവാസ് വള്ളിക്കുന്ന്, അനീഷ്, ആമി, ഉണ്ണിരാജ, സോഹന്‍ സിനുലാല്‍, ഭാനുപയ്യന്നൂര്‍ രാജേഷ് അഴിക്കോടന്‍, ശരത് ലാല്‍, കിരണ്‍ രമേശ്, വിസ്മയ ശശികുമാർ എന്നിവരും നിരവധി പുതുമുഖങ്ങളും ഈ ചിത്രത്തില്‍ അണിനിരക്കുന്നു. മനു മഞ്ജിത്തിന്റെയും ഹരിനാരായണന്റെയും വരികള്‍ക്ക് അരുണ്‍ മുരളീധരന്‍ ഈണം പകര്‍ന്നിരിക്കുന്നു. ശങ്കര്‍ ശര്‍മയാണ് ബി.ജി.എം. ഫൈസല്‍ അലി ഛായാഗ്രഹണവും രതിന്‍ രാധാകൃഷ്ണന്‍ എഡിറ്റിംഗും നിര്‍വ്വഹിക്കുന്നു. കലാസംവിധാനം -അജയന്‍ മങ്ങാട്.
