മോന്‍സണ്‍ മാവുങ്കല്‍ പ്രതിയായ തട്ടിപ്പ് കേസില്‍ കെപിസിസി അധ്യക്ഷന്‍ കെ സുധാകരന് രണ്ടാം പ്രതിയാക്കി റിപ്പോര്‍ട്ട് നല്‍കി ക്രൈം ബ്രാഞ്ച്. സുധാകരനെ പ്രതിചേര്‍ത്ത് ക്രൈം ബ്രാഞ്ച് എറണാകുളം എ.സി.ജെ.എം കോടതിയില്‍ റിപ്പോര്‍ട്ട് നല്‍കി. വഞ്ചനാക്കുറ്റം ചുമത്തിയാണ് കേസില്‍ റിപ്പോര്‍ട്ട് നല്‍കിയിരിക്കുന്നത്.
ബുധനാഴ്ച കളമശ്ശേരി ഓഫീസില്‍ ചോദ്യം ചെയ്യലിന് ഹാജരാകാന്‍ കെ. സുധാകരനോട് ക്രൈം ബ്രാഞ്ച് ആവശ്യപ്പെട്ടിട്ടുണ്ട്.
സി.ആര്‍.പി.സി 41 എ വകുപ്പ് പ്രകാരമാണ് കെ. സുധാകരന് ക്രൈം ബ്രാഞ്ച് നോട്ടീസ് നല്‍കിയത്. നോട്ടീസ് നല്‍കിയ വിവരം പുറത്തുവന്നപ്പോള്‍ തന്നെ കെ. സുധാകരന് കേസില്‍ പ്രതിയാണെന്ന കാര്യം വ്യക്തമാക്കിയിരുന്നു. ഒരു വര്‍ഷത്തിലേറെയായി നീണ്ട അന്വേഷണത്തിലൊടുവിലാണ് കെ. സുധാകരനെ പ്രതിയാക്കിയുള്ള റിപ്പോര്‍ട്ട് കോടതിയില്‍ സമര്‍പ്പിച്ചിരിക്കുന്നത്.
മോന്‍സണ്‍ കേസിലെ പരാതിക്കാര്‍ മുഖ്യമന്ത്രിക്കടക്കം നല്‍കിയ പരാതിയില്‍ കെ. സുധാകരന്റെ പേരുണ്ടായിരുന്നു. പിന്നാലെ മോന്‍സന്റെ വീട്ടില്‍ കെ. സുധാകരന് എത്തിയതിന്റെ ചിത്രങ്ങളും പുറത്തുവന്നിരുന്നു. മോന്‍സണ്‍ മാവുങ്കലിന് പണം കൈമാറാനെത്തിയപ്പോള്‍ കെ. സുധാകരന് ഇയാള്‍ക്കൊപ്പമുണ്ടായിരുന്നുവെന്നും പരാതിക്കാര്‍ പറഞ്ഞു.
