പൊതുമരാമത്ത് വകുപ്പ് മന്ത്രി പി.എ മുഹമ്മദ് റിയാസിനെ പൊതുപരിപാടിക്കിടെ വിമര്ശിച്ച് പത്തനാപുരം എം.എല്.എ കെ.ബി ഗണേഷ് കുമാര്. പത്തനാപുരം ബ്ലോക്കില് 100 മീറ്റര് റോഡ് പോലും ഈ വര്ഷം പി.ഡബ്ല്യു.ഡി അനുവദിച്ചില്ലെന്നും തന്നെ പോലുള്ള മുതിര്ന്ന ജനപ്രതിനിധികളുടെ ആവശ്യം മന്ത്രി പരിഗണിക്കുന്നില്ലെന്നും ഗണേഷ് കുമാര് വിമര്ശിച്ചു.
പത്തനാപുരത്ത് ഈസ്റ്റ്-കോക്കുളത്ത് ഏല-പട്ടമല റോഡിന്റെ ഉദ്ഘാടന ചടങ്ങിനിടെയാണ് എം.എല്.എയുടെ വിമര്ശനം.
‘കേരള നിയമസഭയില് അഞ്ച് തവണ ജയിച്ചുവന്ന അപൂര്വ്വം ആള്ക്കാരേയുള്ളു. ഉമ്മന്ചാണ്ടി മരിച്ചതിന് ശേഷം ഞാനും വി.ഡി സതീശനും റോഷി അഗസ്റ്റിനും കോവൂര് കുഞ്ഞുമോനും. ഈ നാലേ നാല് പേര് മാത്രമാണ് അഞ്ച് തവണ തുടര്ച്ചയായി വിജയച്ച് വന്നത്. അങ്ങനെ ഉള്ള ആളുകളെ ഒന്ന് മാനിക്കണമെന്ന അഭിപ്രായം എനിക്കുണ്ട്. ഇതില് സീനിയോരിറ്റി ഒക്കെ ഉണ്ട്. സിനിമാനടന് ആണെന്നുള്ള പരിഗണനയൊന്നും വേണ്ട. ഇവരെക്കാളുമൊക്കെ 20 വര്ഷം മുമ്പ് മന്ത്രിയായ ആളാണ് ഗണേഷ് കുമാര്. ഒരു മര്യാദയൊക്കെ വേണമെന്നാണ് എന്റെ അഭിപ്രായം,’ ഗണേഷ് കുമാര് പറഞ്ഞു.
ഇപ്പോള് വേണ്ട വിധത്തില് റോഡുകള് തരുന്നില്ല. പക്ഷെ മുന് പൊതുമരാമത്ത് വകുപ്പ് മന്ത്രി ജി സുധാകരന് തന്നിരുന്നു. ജി സുധാകരന് സ്നേഹവും പരിഗണനയും നല്കിയിരുന്നു എന്നും ഗണേഷ് കുമാര് പറഞ്ഞു. റോഡ് ഉദ്ഘാടന ചടങ്ങില് ഫണ്ട് അനുവദിച്ച ജി സുധാകരന്റെ ചിത്രം വെയ്ക്കാതിരുന്ന സംഘാടകരെ ഗണേഷ് വിമര്ശിക്കുകയും ചെയ്തിരുന്നു.