കാട്ടാന ആക്രമണത്തില്‍ പരിക്കേറ്റ മാവോയിസ്റ്റ് സുരേഷിനെ യുഎപിഎ ചുമത്തി അറസ്റ്റ് ചെയ്യും. അന്വേഷണം എടിഎസ് ഏറ്റെടുക്കും. കാട്ടാനയുടെ ആക്രമണത്തില്‍ പരിക്കേറ്റ സുരേശഷിനെ കാഞ്ഞിരക്കൊല്ലി ചിറ്റാരി കോളനിയില്‍ ഉപേക്ഷിച്ച് കടന്ന് കളയുകയായിരുന്നു.
ഇന്നലെ വൈകിട്ട് ആറ് മണിക്കാണ് കോളനിയിലെ ചപ്പിലി കൃഷ്ണന്‍ എന്നയാളുടെ വീട്ടില്‍ ആറംഗ സംഘം എത്തിയത്. മൂന്ന് ദിവസം മുമ്പ് ആനയുടെ ആക്രമണത്തില്‍ പരിക്കേറ്റ സുരേഷിനെ ചികിത്സിക്കണമെന്ന് ആവശ്യപ്പെടുകയായിരുന്നു. സുരേഷിനെ വീട്ടില്‍ കിടത്തിയ ശേഷം ഇവര്‍ കാട്ടിലേക്ക് മടങ്ങുകയും ചെയ്തു.
രണ്ട് വനിതകള്‍ ഉള്‍പ്പെട്ട സംഘമാണ് സുരേഷിനെ കൃഷ്ണന്‍ എന്നയാളുടെ വീട്ടില്‍ എത്തിച്ചത്. ചിക്കമംഗലൂരു സ്വദേശിയാണ് സുരേഷ്.
പയ്യാവൂര്‍ പഞ്ചായത്ത് പ്രസിഡന്റ് സാജു സേവിയര്‍ അടക്കമുള്ളവര്‍ കോളനിയിലെത്തി നാട്ടുകാരുടെ സഹായത്തോടെ ആശുപത്രിയിലേക്ക് മാറ്റുകയായിരുന്നു. നിലവില്‍ പരിയാരം മെഡിക്കല്‍ ചികിത്സയിലാണ്. ആരോഗ്യനില തൃപ്തികരമാണെന്ന് ഡോക്ടര്‍മാര്‍ അറിയിച്ചു.
