ഏറ്റവും വലിയ ഫിറ്റ്നസ് കമ്പനികളിലൊന്നായ ലീജാം സ്പോർട്സുമായി സഹകരിച്ച് പുതിയ സംരംഭം ആരംഭിക്കുന്നുവെന്ന് ബുർജീൽ ഹോൾഡിങ്‌സ് പ്രഖ്യാപിച്ചു. യു എ ഇ യിലും സൗദി അറേബ്യയിലുമായി ഫിറ്റ്നസ് ടൈം ബ്രാൻഡിലുള്ള 155 ഫിറ്റ്നസ് സെൻ്ററുകളുടെ ഉടമയാണ് സൗദി സ്റ്റോക്ക് എക്സ്ചേഞ്ചിൽ ലിസ്റ്റ് ചെയ്തിരിക്കുന്ന ലീജാം സ്പോർട്സ്.
സ്പോർട്സ് മെഡിസിൻ, സമഗ്ര റീഹാബിലിറ്റേഷൻ, തുടങ്ങിയ നിരവധി സേവനങ്ങൾ ലഭ്യമാക്കുകയാണ് ബുർജീൽ ഹോൾഡിങ്‌സും ലീജാം സ്പോർട്സും സംയുക്തമായി ആരംഭിക്കുന്ന ഈ സംരഭത്തിലൂടെ ലക്ഷ്യമാക്കുന്നത്. ഇതിനായി 60-ലധികം ക്ലിനിക്കുകളാണ് സൗദിയിലുടനീളം സ്ഥാപിക്കാനും പ്രവർത്തിപ്പിക്കാനും തീരുമാനിച്ചിട്ടുള്ളതെന്ന് ഔദ്യോഗിക വൃത്തങ്ങൾ അറിയിച്ചു.
ഫിസിയോതെറാപ്പി, റീഹാബിലിറ്റേഷൻ എന്നീ സേവനങ്ങൾ കൂടാതെ ഓക്സിചേമ്പർ, ക്രിപ്റ്റോതെറാപ്പി, വിറ്റാമിൻ ഇൻഫ്യൂഷൻ തുടങ്ങിയവയും ലഭ്യമാക്കും. ആയുർവേദവും പ്രകൃതിചികിത്സയും അടക്കമുള്ള കോംപ്ലിമെന്ററി മെഡിസിൻ സേവനങ്ങളും പുതിയ ക്ലിനിക്കുകളിൽ ലഭ്യമാക്കും. അതേസമയം ന്യൂറോളജിക്കൽ, വേദന, മസ്കുലോസ്കലെറ്റൽ എന്നീ പ്രശ്നങ്ങൾക്കുള്ള വിദഗ്ധ മെഡിക്കൽ സേവനങ്ങളും ഇതോടൊപ്പം ഫിറ്റ്നസ് ക്ലിനിക്കുകളിലൂടെ ലക്ഷ്യമിടുന്നുണ്ടെന്നും ഔദ്യോഗിക വൃത്തങ്ങൾ കൂട്ടിച്ചേർത്തു.
അതേസമയം റിയാദ് നഗരത്തിലെ ആറ് കേന്ദ്രങ്ങളിലും പുതിയ ക്ലിനിക്കുകൾ തുറക്കുന്നുണ്ട്. അടുത്ത 12 മുതൽ 18 മാസത്തിനുള്ളിൽ സൗദിയിലെ ലീജാം ശൃംഖലയിലുടനീളം ഈ സേവനങ്ങൾ വിപുലീകരിക്കാനാണ് തീരുമാനമെന്ന് അധികൃതർ അറിയിച്ചു. സൗദിയിലെ കായിക മേഖലയ്ക്ക് വലിയ പ്രോത്സാഹനമാണ് പുതിയ സംരംഭം. സൗദി കായിക മന്ത്രാലയത്തിൻ്റെ പിന്തുണയോടെയാണ് ഈ സേവനങ്ങൾ യാഥാർഥ്യമാകുന്നതെന്നും അവർ പറഞ്ഞു.
ഉന്നത നിലവാരമുള്ള ഫിറ്റ്നസ് സേവനങ്ങളിലൂടെ ശ്രദ്ധേയമായ ലീജാമുമായി കായിക മേഖലയ്ക്ക് വലിയ പ്രാധാന്യമുള്ള സൗദിയിലേക്ക്‌ ഇത്തരത്തിൽ ഒരു പ്രവേശനം നടത്തുന്നത് ഏറെ സന്തോഷമുണ്ടെന്ന് ബുർജീൽ ഹോൾഡിങ്‌സ് സ്ഥാപകനും ചെയർമാനുമായ ഡോ. ഷംഷീർ വയലിൽ പറഞ്ഞു. എല്ലാ തലങ്ങളിലും കഴിവ് തെളിയിച്ച കായികതാരങ്ങൾക്കും കായികമേഖലയിൽ താല്പര്യമുള്ള യുവാക്കൾക്കും ആവശ്യമായ മെഡിക്കൽ റീഹാബിലിറ്റേഷൻ സേവനങ്ങൾ നൽകുകയാണ് ബുർജീൽ ഹോൾഡിങ്‌സിൻ്റെ ലക്ഷ്യം. കൂടാതെ കായിക താരങ്ങൾക്ക് അവരുടെ പ്രകടനത്തിൽ മികവുറ്റവരാവുന്നതിനായി മികച്ച പിന്തുണയും ഈ സംരംഭം സൃഷ്ടിക്കുന്നുണ്ടെന്നും ഡോ. ഷംഷീർ പറഞ്ഞു.
സൗദി നിയമപ്രകാരം പുതുതായി രൂപീകരിച്ച കമ്പനിയിലൂടെയാണ് സംയുക്ത സംരംഭത്തിന്റെ പ്രവർത്തങ്ങൾ നടക്കുക. ഇതിൽ ബുർജീലിനും ലീജാമിനും തുല്യമായ ഓഹരി പങ്കാളിത്തമാണുള്ളത്. കൂടാതെ സൗദിയിലെ പ്രവർത്തനം ശക്തമാക്കുന്നതിൻ്റെ ഭാഗമായി ബുർജീൽ ഹോൾഡിങ്‌സ് നിരവധി ആശുപത്രികളുടെ ഇതരാ പ്രവർത്തനങ്ങളും മെയിന്റനൻസും ഏറ്റെടുക്കുന്നതിനുള്ള ചർച്ചകളിലാണ്.
അതേസമയം മികച്ച അന്താരാഷ്ട്ര നിലവാരത്തിലുള്ള സംയോജിത സ്പോർട്സ് മെഡിസിൻ സേവനങ്ങൾ പുതിയ ക്ലിനിക്കുകളിലൂടെ ലഭ്യമാക്കാൻ സാധിക്കും. ആരോഗ്യ സംരക്ഷണവും ശാരീരിക ക്ഷമതയും ഉയർത്താനുതകുന്ന തരത്തിലുള്ള സേവനങ്ങൾ നൽകാനുള്ള കമ്പനിയുടെ ശ്രമങ്ങളുടെ തുടർച്ചയാണ് പുതിയ സംരംഭമെന്നും ലീജാം സ്പോർട്സ് ചെയർമാൻ അലി അൽ സാഗ്രി കൂട്ടിച്ചേർത്തു.
