ജർമനിയെ 2–1ന് തോൽപ്പിച്ചതിൻ്റെ ആത്മവിശ്വാസവുമായി കോസ്റ്ററിക്കയെ നേരിടാനിറങ്ങിയ ജപ്പാന് തോറ്റുമടങ്ങേണ്ടി വന്നു. 81–ാം മിനിറ്റിൽ കീഷർ ഫുള്ളറിലൂടെ കോസ്റ്ററിക്ക നേടിയ ഗോൾ ജപ്പാന് തിരിച്ചടിയായി; സ്കോർ 1–0.
ആദ്യ മത്സരത്തിൽ എതിരില്ലാത്ത 7 ഗോളുകൾക്ക് സ്പെയിൻ പരാജയപ്പെടുത്തിയ കോസ്റ്ററിക്ക കളത്തിൽ ഉൾവലിഞ്ഞാണ് കളിച്ചത്. എന്നാൽ ഇന്ന് കൃത്യമായ പ്ലാനോടെ ഇറങ്ങിയ കോസ്റ്ററിക്കയ്ക്കു മുന്നിൽ ജപ്പാൻ പതറുന്ന കാഴ്ചയാണ് ആദ്യപകുതിയിൽ കണ്ടത്.
രണ്ടാം പകുതിയിൽ തുടരെത്തുടരെ കോസ്റ്ററിക്കൻ ഗോൾപോസ്റ്റിലേക്ക് ജപ്പാൻ ഗോൾ ശ്രമം നടത്തിയെങ്കിലും പ്രതിരോധക്കോട്ട കെട്ടി കോസ്റ്ററിക്ക മുന്നിൽ നിന്നു.
അവസാന മിനിറ്റുകളിൽ രണ്ടും കൽപ്പിച്ച് തുടരെ തുടരെ കോസ്റ്ററിക്കൻ ഗോളിയെയും പ്രതിരോധനിരയെയും ജപ്പാൻ്റെ മുന്നേറ്റനിര പരീക്ഷിച്ചു. എന്നാൽ കൈലർ നവാസും സംഘവും കൃത്യമായി പ്രതിരോധിച്ചതോടെ ജപ്പാൻ വീണു. വിജയത്തോടെ കോസ്റ്ററിക്ക പ്രീക്വാര്ട്ടറിലേക്ക് പ്രതീക്ഷ നിലനിർത്തി.