അമിതശബ്ദം പുറപ്പെടുവിക്കുന്നത് മൂലം കുവൈറ്റിലെ 10,448 വാഹനങ്ങൾക്കെതിരെ നടപടിയെടുത്തു. കഴിഞ്ഞ മൂന്ന് മാസത്തിനുള്ളിലാണ് ഇത്രയും വാഹനങ്ങൾക്കെതിരെ നടപടി സ്വീകരിച്ചത്. ട്രാഫിക് സുരക്ഷാ പരിശോധനകളിലാണ് ഇത്തരം വാഹനങ്ങൾ അധികൃതരുടെ ശ്രദ്ധയിൽപ്പെട്ടത്.
ഉച്ചത്തിലുള്ള ശബ്ദം പുറപ്പെടുവിക്കുന്നത് നിരീക്ഷിക്കാനും ട്രാക്ക് ചെയ്യാനും നിർദേശമുണ്ട്. മന്ത്രാലയത്തിന്റെ ജനറൽ ഡിപ്പാർട്മെന്റ് ഓഫ് റിലേഷൻസ് ആൻഡ് സെക്യൂരിറ്റി മീഡിയയാണ് ഇക്കാര്യം അറിയിച്ചത്. അതേസമയം നിയമം ലംഘിക്കുന്നവരെ കണ്ടെത്തുന്നതിനായി രാജ്യത്തുടനീളം ട്രാഫിക് സുരക്ഷാ ക്യാമ്പയിനുകൾ സംഘടിപ്പിച്ചിരുന്നു.
റോഡുകളിൽ മോശം പെരുമാറ്റം ശ്രദ്ധയിൽപ്പെടുകയാണെങ്കിൽ എമർജൻസി നമ്പറായ 112 എന്ന നമ്പറിൽ ബന്ധപ്പെടണം. കൂടാതെ 965-99324092 എന്ന നമ്പറിൽ വാട്സാപ്പ് സന്ദേശവും അയക്കാം. അതേസമയം ട്രാഫിക് നിയമങ്ങളും നിയന്ത്രണങ്ങളും പാലിക്കണമെന്ന് ജനങ്ങളോട് മന്ത്രാലയം അഭ്യർത്ഥിച്ചു.
