തിരുവനന്തപുരം മെഡിക്കല് കോളേജിലെ യുവ ഡോക്ടര് ഷഹനയുടെ ആത്മഹത്യയില് ആണ് സുഹൃത്ത് ഡോ. ഇ എ റുവൈസ് കസ്റ്റഡിയില്. ഒളിവിലായിരുന്ന ഡോ. റുവൈസിനെ ഇന്ന് പുലര്ച്ചെയോടെയാണ് കസ്റ്റഡിയിലെടുത്തത്.കൊല്ലം കരുനാഗപ്പള്ളിയില് നിന്നാണ് തിരുവനന്തപുരം മെഡിക്കല് കോളേജ് പൊലീസ് റുവൈസിനെ കസ്റ്റഡിയില് എടുക്കുന്നത്.
കഴിഞ്ഞ ദിവസം തന്നെ റുവൈസിനായുള്ള അന്വേഷണം ആരംഭിച്ചിരുന്നു. ഹോസ്റ്റലിലും ബന്ധുവീടുകളിലും അന്വേഷിച്ചെത്തിയെങ്കിലും കണ്ടെത്താനായില്ല. തുടര്ന്നാണ് കരുനാഗപ്പള്ളിയില് നിന്ന് ഇയാളെ പിടികൂടിയത്.
പി.ജി ഡോക്ടര്മാരുടെ സംഘടനയുടെ നേതാവായിരുന്നു റുവൈസ്. റുവൈസിനെതിരെ ആത്മഹത്യ പ്രേരണക്കുറ്റവും സ്ത്രീധന നിരോധന വകുപ്പ് പ്രകാരം ജാമ്യമില്ല വകുപ്പ് ചുമത്തിയും പൊലീസ് കേസെടുത്തിട്ടുണ്ട്.
ഡോ. ഷഹനയുമായി റുവൈസിന്റെ വിവാഹം നിശ്ചയിച്ചിരുന്നു. ഇരുവരും അടുപ്പത്തിലുമായിരുന്നെന്നതിന്റെ സൂചനകള് പൊലീസിന് ലഭിച്ചിട്ടുണ്ട്. വിവാഹത്തിന് ഭീമമായ സ്ത്രീധനമാണ് റുവൈസിന്റെ വീട്ടുകാര് ചോദിച്ചതെന്ന് ഷഹനയുടെ കുടുംബം ആരോപിക്കുന്നു. ഇത്രയും സ്ത്രീധന തുക നല്കാന് സാധിക്കാതായതോടെ റുവൈസ് വിവാഹത്തില് നിന്ന് പിന്മാറി. തുടര്ന്ന് ഷഹന മാനസികമായി തകര്ന്നിരിക്കുകയായിരുന്നുവെന്നും ഇതാണ് ആത്മഹത്യയ്ക്ക് കാരണമെന്നും കുടുംബം പറഞ്ഞിരുന്നു.
150 പവനും 15 ഏക്കര് ഭൂമിയും ഒരു ബിഎംഡബ്ല്യു കാറുമാണ് റുവൈസിന്റെ കുടുംബം സ്ത്രീധനമായി ചോദിച്ചത്. ഷഹനയുടെ ആത്മഹത്യ കുറിപ്പിലും സ്ത്രീധനവുമായി ബന്ധപ്പെട്ട സൂചനകളുണ്ട്.