കോഴിക്കോടുണ്ടായ വാഹനാപകടത്തിൽ ദമ്പതികൾ മരണമടഞ്ഞു. ദുബായ് ആസ്ഥാനമായി പ്രവർത്തിക്കുന്ന ബിസിനസ്സ് സെറ്റപ്പ് സെൻ്ററായ എമിറേറ്റ്സ് ഫസ്റ്റ് ചെയർമാൻ ജമാദ് ഉസ്മാൻ്റെ മാതാപിതാക്കളാണ് മരിച്ചത്. കുറ്റിച്ചിറ സ്വദേശി മുഹമ്മദ് കോയ (72), ഭാര്യ സുഹറാബി (62) എന്നിവർക്കാണ് ദാരുണാന്ത്യം.
നിയന്ത്രണം നഷ്ടപ്പെട്ട ബൈക്കിൽനിന്നു വീണ ദമ്പതികളുടെ ശരീരത്തിലൂടെ കെഎസ്ആർടിസി ബസ് കയറിയിറങ്ങുകയായിരുന്നു. കോഴിക്കോട് കിസ്സൺ കോർണറിന് മുന്നിൽ വെള്ളിയാഴ്ച വൈകിട്ട് 6.15നാണ് അപകടം.റോഡിലെ ഡിവൈഡറിൽ തട്ടിയതോടെയാണ് ബൈക്കിൻ്റെ നിയന്ത്രണം നഷ്ടമായത്.പിന്നാലെ വന്ന കെഎസ്ആർടിസി ബസിനു മുന്നിലേക്ക് വീഴുകയായിരുന്നു ദമ്പതികൾ.
ഗുരുതരമായി പരുക്കേറ്റ ഇരുവരെയും ഉടൻ കോഴിക്കോട് മെഡിക്കൽ കോളജ് ആശുപത്രിയിൽ എത്തിച്ചെങ്കിലും രക്ഷിക്കാനായില്ല. കുറ്റിച്ചിറ മണ്ഡലം കോൺഗ്രസ് കമ്മിറ്റി സെക്രട്ടറിയായിരുന്നു മുഹമ്മദ് കോയ. മക്കൾ: ജമാദ് ഉസ്മാൻ, അഹ്ലൻ, ജൈസൽ, ജഫ്ന, ജലീസ.