കോഴിക്കോട് നഗരത്തില് ബൈക്ക് യാത്രികരായ ദമ്പതികള്ക്ക് നേരെ ആക്രമണമുണ്ടായതായി പരാതി. രണ്ട് ബൈക്കുകളിലായി എത്തിയവര് പിന്തുടര്ന്ന് വന്ന് ഭാര്യയെ ശല്യം ചെയ്തു. ഇത് ചോദ്യം ചെയ്തപ്പോഴാണ് ആക്രമണമുണ്ടായതെന്നാണ് ദമ്പതികള് പറഞ്ഞത്.
ഇന്നലെ രാത്രി പത്തുമണിയോടെയാണ് സംഭവം. ഇരിങ്ങാടന് പള്ളി സ്വദേശി അശ്വിനും ഭാര്യയ്ക്കും നേരെയാണ് ആക്രമണമുണ്ടായത്. സിനിമ കഴിഞ്ഞ് ഭക്ഷണം കഴിക്കാന് ടൗണിലേക്ക് പോകുന്ന വഴിയാണ് യുവാക്കളായ കുറച്ചുപേര് ബൈക്കില് പിന്തുടര്ന്ന് ഭാര്യയോട് മോശമായി പെരുമാറിയത്. ഇത് ചോദ്യം ചെയ്തതിനാണ് തന്നെ കൂട്ടത്തിലുള്ള ഒരാള് വന്ന് മര്ദ്ദിച്ചതെന്നാണ് അശ്വിന് പറയുന്നത്.
എന്നാല് പരാതിപ്പെട്ടിട്ടും നടപടിയുണ്ടായില്ലെന്ന് അശ്വിന് പറഞ്ഞു. രാത്രി തന്നെ രേഖാമൂലം പൊലീസില് പരാതി നല്കിയതാണ്. ഇതുവരെ പൊലീസ് സംഭവം തിരക്കുക പോലും ചെയ്തില്ലെന്നും അശ്വിന് പറഞ്ഞു.
അതേസമയം ആക്രമിച്ച വണ്ടിയുടെ ആര്.സി ഉടമയെ ബന്ധപ്പെട്ടെങ്കിലും കിട്ടിയില്ലെന്നും ദമ്പതികളുടെ മൊഴി എടുക്കുമെന്നുമാണ് നടക്കാവ് പൊലീസ് പറയുന്നത്.