അരിക്കൊമ്പന്റെ ആക്രമണ ഭീതിയില് കമ്പം ജനവാസമേഖല. കമ്പം ടൗണില് ഇറങ്ങിയ അരിക്കൊമ്പന് ജനവാസ മേഖലയിലൂടെ ഓടിയത് ജനങ്ങളെ പരിഭ്രാന്തിയിലാക്കി. ജനങ്ങള്ക്ക് പിന്നാലെയും ആന ഓടി.
കമ്പത്ത് ആനയുടെ ആക്രമണത്തില് ഒരാള്ക്ക് പരിക്കേല്ക്കുകയും അഞ്ച് വാഹനങ്ങള് തകര്ക്കുകയും ചെയ്തു.
ചിന്നക്കനാലില് നിന്ന് പെരിയാര് കടുവാ സങ്കേതത്തില് എത്തിച്ച അരിക്കൊമ്പന് തമിഴ്നാട് ലോവര് ക്യാംപില് നിന്നും വനാതിര്ത്തിയിലൂടെ കമ്പത്ത് എത്തിയതെന്നാണ് സൂചന. രാവിലെ മുതല് ആന ടൗണില് പരിഭ്രാന്തി സൃഷ്ടിക്കുകയാണ്.
ഗൂഢല്ലൂരിനിടയിലുള്ള വനമേഖലയിലായിരുന്നു അരിക്കൊമ്പന് കഴിഞ്ഞ ദിവസം ഉണ്ടായിരുന്നത്. രാവിലെ ആനയുടെ സിഗ്നല് നഷ്ടമാവുകയും ചെയ്തു. തുടര്ന്ന് നടത്തിയ തെരച്ചിലില് ആണ് ആന കമ്പം ജനവാസമേഖലയില് എത്തിയെന്ന് അറിയുന്നത്.
അതേസമയം ജനങ്ങളോട് ജാഗ്രത പാലിക്കാന് തമിഴ്നാട് പൊലീസ് നിര്ദേം നല്കിയിട്ടുണ്ട്. അരിക്കൊമ്പനെ തളയ്ക്കാന് കുങ്കിയാനകളെ ഇറക്കിയേക്കുമെന്ന് സൂചനയുണ്ട്. തമിഴ്നാടിന്റെ പല ഭാഗങ്ങളില് നിന്നായി കുങ്കിയാനകളെ കമ്പത്തേക്ക് എത്തിക്കാനുള്ള നടപടികള് ആരംഭിച്ചതായാണ് വിവരം. മയക്കുവെടി വെച്ചേക്കുമെന്നും സൂചനയുണ്ട്. നേരത്തെ ആനയെ ആകാശത്തേക്ക് വെടിവെച്ച് തുരത്താന് ശ്രമം നടത്തിയിരുന്നു.