കോഴിക്കോട്ടെ ആര്ട്ടിഫിഷ്യല് ഇന്റലിജന്സ് വഴി തട്ടിപ്പ് നടത്തിയതിന് പിന്നില് കൂടുതല് പേരുണ്ടാക്കാന് സാധ്യതയെന്ന് പൊലീസ്. പരാതിക്കാരന്റെ സുഹൃത്തുക്കളുടെ വാട്സാപ്പ് ഹാക്ക് ചെയ്താകാം പ്രതികള് തട്ടിപ്പ് നടത്താനായി വിവരങ്ങള് ശേഖരിച്ചതെന്ന് പൊലീസ്. എ.ഐ സാങ്കേതിക വിദ്യ ഉപയോഗിച്ചുള്ള പണം തട്ടിപ്പിന് പിന്നില് കൂടുതല് പേരുണ്ടെന്നാണ് പൊലീസ് നിഗമനം. പ്രതി വിളിച്ച ഫോണ് നമ്പറിന്റെ വിശദാംശങ്ങള് കണ്ടെത്താനുള്ള ശ്രമം തുടങ്ങി.
പരാതിക്കാരനായ പി.എസ് രാധാകൃഷ്ണന് കോഴിക്കോട് സിറ്റി സൈബര് പൊലീസ് സ്റ്റേഷനില് എത്തി കൂടുതല് വിവരങ്ങള് കൈമാറി. പരാതിക്കാരന് അംഗമായ വാട്സാപ് ഗ്രൂപ്പ് വഴിയാകാം ഇയാളുടെ വിവരങ്ങള് ശേഖരിച്ചിരിക്കുക. രാധാകൃഷ്ണന്റെ ഫോണ് ഹാക്ക് ചെയ്തിട്ടില്ലെന്നും ഡി.സി.പി മാധ്യമങ്ങളോട് പറഞ്ഞു.
നഷ്ടമായ 40,000 രൂപയുടെ കൈമാറ്റം തടഞ്ഞതായി പൊലീസ് അറിയിച്ചു. രത്നാകര് ബാങ്കിലെ ഗുജറാത്തിലെ ഒരു അക്കൗണ്ടിലേക്കാണ് ആദ്യം പണം പോയത്. പിന്നീട് മഹാരാഷ്ട്രയിലെ ഒരു ബാങ്ക് അക്കൗണ്ടിലേക്ക് ഈ പാണം ട്രാന്സ്ഫര് ചെയ്തു. ഈ അക്കൗണ്ട് ഫ്രീസ് ചെയ്തിട്ടുണ്ടെന്നും ഡി.സി.പി അറിയിച്ചു.
വാട്സാപ്പ് കോളിലൂടെ എ.ഐ സാങ്കേതിക വിദ്യയായ ഡീപ് ഫേക്ക് വഴിയാണ് പഴയ സുഹൃത്താണെന്ന വ്യാജേന പണം തട്ടിയത്. ആശുപത്രി ചെലവിനാണെന്നും താന് ദുബായില് നിന്ന് എത്തിയാല് ഉടന് പണം അക്കൗണ്ടില് ഇടാമെന്നും പറഞ്ഞാണ് ഇയാള് പണം വാങ്ങിയത്. ആദ്യം പണം ഇട്ടു, രണ്ടാമതും പണം ചോദിച്ചതോടെയാണ് സംശയം തോന്നിയത്. പിന്നീട് കൈവശമുണ്ടായിരുന്ന നമ്പറില് ഈ സുഹൃത്തിനെ ബന്ധപ്പെട്ടതോടെയാണ് താന് തട്ടിപ്പിനിരയായെന്ന് രാധാകൃഷ്ണന് തിരിച്ചറിഞ്ഞത്. പിന്നാലെ പരാതിപ്പെടുകയായിരുന്നു. കോഴിക്കോട് പാലാഴി സ്വദേശിയാണ് തട്ടിപ്പിനിരയായ രാധാകൃഷ്ണന്.