ദുബായ് പൊലീസിന് 100 എസ് യു വി വാഹനങ്ങൾ സംഭാവനയായി നല്‍കി പ്രമുഖ വ്യവസായി. അൽ ഹബ്തൂർ ഗ്രൂപ്പിന്റെ സ്ഥാപകനും ചെയർമാനുമായ ഖലഫ് അഹമ്മദ് അൽ ഹബ്തൂരിയാണ് മിത്സുബിഷി പജേറോ വാഹനങ്ങൾ ദുബായ് പൊലീസിന് സമ്മാനിച്ചത്. പൊതുജനങ്ങളെ സംരക്ഷിക്കാനുള്ള സേനയുടെ ശ്രമങ്ങളെ പിന്തുണയ്ക്കുന്നതിന്റെ ഭാഗമായാണ് വാഹനങ്ങൾ വിതരണം ചെയ്തതെന്ന് അദ്ദേഹം പറഞ്ഞു.
രാജ്യത്ത് സുരക്ഷിതത്വ ബോധം വർദ്ധിപ്പിക്കുന്നതിന് ദുബായ് പോലീസുമായി സഹകരിക്കുന്നതിൽ അഭിമാനമുണ്ട്. രാജ്യത്തെയും ജനങ്ങളെയും സേവിക്കാൻ സർക്കാരുമായി കൈകോർക്കുക എന്നത് സാമൂഹിക ഉത്തരവാദിത്തമാണെന്ന് വിശ്വസിക്കുന്നുവെന്നും ഖലഫ് അഹമ്മദ് അൽ ഹബ്തൂരി വ്യക്തമാക്കി. അതേസമയം പൊലീസിന്റെ പട്രോളിങ് സേനയ്ക്ക് പുതിയ വാഹനങ്ങൾ മുതൽക്കൂട്ടാകുമെന്ന് ദുബായ് പൊലീസ് കമാൻഡർ ഇൻ ചീഫ് ജനറൽ അബ്ദുല്ല ഖലീഫ അൽ മർറ പറഞ്ഞു.
ദുബായ് ഡൗൺ ടൗണിലെ ഹബ്തൂർ പാലസിന് മുന്നിൽ നിർത്തിയിട്ടിരിക്കുന്ന പുതിയ പട്രോൾ കാറുകളുടെ ചിത്രങ്ങൾ പങ്കുവച്ചുകൊണ്ടാണ് ദുബായ് പൊലീസ് ഇക്കാര്യം അറിയിച്ചത്. ദുബായ് പൊലീസ് കമാൻഡർ ഇൻ ചീഫ് ജനറൽ അബ്ദുല്ല ഖലീഫ അൽ മർറി, ഓപറേഷൻസ് അഫയേഴ്‌സ് അസിസ്റ്റന്റ് കമാൻഡർ ഇൻ ചീഫ് മേജർ ജനറൽ അബ്ദുല്ല അലി അൽ ഗൈത്തി, തുടങ്ങിയ മുതിര്‍ന്ന ഉദ്യോഗസ്ഥരും വിതരണചടങ്ങില്‍ പങ്കെടുത്തു.
