തിരുവനന്തപുരം: സംസ്ഥാനത്തിൻ്റെ പേര് തിരുത്താൻ കേന്ദ്രസർക്കാരിനോട് ആവശ്യപ്പെട്ട് കൊണ്ട് കേരളം പ്രമേയം പാസ്സാക്കി. ഭരണഘടനയിലും ഔദ്യോഗിക രേഖകളിലും കേരള എന്നാണ് സംസ്ഥാനത്തെ വിശേഷിപ്പിക്കുന്നത്. ഇതു മാറ്റി കേരളം എന്നാക്കണമെന്നാണ് നിയമസഭാ പാസാക്കിയ പ്രമേയത്തിൽ ആവശ്യപ്പെടുന്നത്. പേരിൽ തിരുത്ത് വരുത്താനുള്ള നടപടികൾ കേന്ദ്രസർക്കാർ വേഗത്തിലാക്കണമെന്നും പ്രമേയത്തിൽ ആവശ്യപ്പെടുന്നുണ്ട്. ഇംഗ്ലീഷിലും മലയാളത്തിലും കേരള (Kerala) എന്നതിന് പകരം കേരളം (Keralam) എന്നു തന്നെ ഉചരിക്കണമെന്നും പ്രമേയത്തിൽ നിർദേശിക്കുന്നു.
പ്രമേയത്തിൻ്റെ പൂർണരൂപം
‘നമ്മുടെ സംസ്ഥാനത്തിന്റെ നാമധേയം മലയാള ഭാഷയില്‍ കേരളം എന്നാണ്. ഭാഷാടിസ്ഥാനത്തില്‍ സംസ്ഥാനങ്ങള്‍ രൂപവല്‍ക്കരിക്കപ്പെട്ടത് 1956 നവംബര്‍ 1-നാണ്. കേരളപ്പിറവി ദിനവും നവംബര്‍ 1-നാണ്. മലയാള ഭാഷ സംസാരിക്കുന്ന ജനവിഭാഗങ്ങള്‍ക്കായി ഐക്യകേരളം രൂപപ്പെടണമെന്നത് ദേശീയ സ്വാതന്ത്ര്യസമര കാലം മുതല്‍ ശക്തമായി ഉയര്‍ന്നുവന്നിരുന്ന ആവശ്യമാണ്. എന്നാല്‍ ഭരണഘടനയുടെ ഒന്നാം പട്ടികയില്‍ നമ്മുടെ സംസ്ഥാനത്തിന്റെ പേര് കേരള എന്നാണ് രേഖപ്പെടുത്തിയിട്ടുള്ളത്. ഇത് കേരളം എന്നാക്കി ഭേദഗതിപ്പെടുത്തുന്നതിനുവേണ്ട അടിയന്തര നടപടികള്‍ ഭരണഘടനയുടെ അനുച്ഛേദം 3 പ്രകാരം കൈക്കൊള്ളണമെന്ന് ഈ നിയമസഭ ഏകകണ്ഠമായി യൂണിയന്‍ ഗവണ്‍മെന്റിനോട് ആവശ്യപ്പെടുന്നു. ഭരണഘടനയുടെ എട്ടാം പട്ടികയില്‍ പറയുന്ന എല്ലാ ഭാഷകളിലും നമ്മുടെ നാട് ‘കേരളം’ എന്ന പേരില്‍ മാറ്റണമെന്നും ഈ സഭ അഭ്യര്‍ത്ഥിക്കുന്നു’
