മുന് മുഖ്യമന്ത്രി ഉമ്മന്ചാണ്ടിയുടെ മൃതദേഹം വഹിച്ചുള്ള വിലാപ യാത്ര ജന്മനാട്ടിലെത്തി. പൊതുദര്ശനത്തിനായി വിലാപയാത്ര തിരുനക്കര മൈതാനത്ത് എത്തിച്ചു. മമ്മൂട്ടി, സുരേഷ് ഗോപി, ദിലീപ്, രമേഷ് പിഷാരടി തുടങ്ങിയ താരങ്ങള്, മന്ത്രിമാര് രാഷ്ട്രീയ രംഗത്തെ പ്രമുഖര് എന്നിവര് മൈതാനത്ത് ഉമ്മന് ചാണ്ടിക്ക് അന്തിമോപചാരമര്പ്പിക്കാന് എത്തി.
മുന് മുഖ്യമന്ത്രിയെ കാണാന് പതിനായിരങ്ങളാണ് മൈതാനത്ത് എത്തിയിരിക്കുന്നത്. ഇന്നലെ തൊട്ട് വന്ന് കാത്തിരിക്കുന്നവരും മൈതാനത്ത് കൂടിയവരിലുണ്ട്.
ഭൗതിക ശരീരവും വഹിച്ചുള്ള വിലാപയാത്ര പുലര്ച്ചെ 5.30 ഓടെയാണ് കോട്ടയം ജില്ലയില് പ്രവേശിച്ചത്. തിരുനക്കര മൈതാനിയില് ഇന്നലെ വൈകുന്നേരം വെച്ച പൊതു ദര്ശനമാണ് ഇന്നത്തേക്ക് നീണ്ടത്. വിലാപയാത്രയ്ക്കിടെ വലിയ തിരക്കാണ് അനുഭവപ്പെട്ടത്.
വൈകുന്നേരം നടക്കുന്ന സംസ്കാര ചടങ്ങില് പങ്കെടുക്കാന് കോണ്ഗ്രസ് നേതാവ് രാഹുല് ഗാന്ധി ഉച്ചയോടെ പുതുപ്പള്ളിയിലെത്തും. സംസ്കാര ചടങ്ങില് കര്ണാടക മുഖ്യമന്ത്രി സിദ്ധരാമയ്യയും പങ്കെടുക്കും.
കുടുംബത്തിന്റെ ആവശ്യപ്രകാരം ഔദ്യോഗിക ബഹുമതികള് ഇല്ലാതെയാണ് മൃതദേഹം ദഹിപ്പിക്കുന്നത്. ഉമ്മന് ചാണ്ടിയുടെ ആഗ്രഹപ്രകാരമാണ് ഔദ്യോഗിക ബഹുമതികള് ഒഴിവാക്കാന് സര്ക്കാരിന് കുടുംബം രേഖാമൂലം കത്ത് നല്കിയത്.