തൃശൂർ: തൃശൂർ ATM കവർച്ച കേസിൽ പിടിയിലായ പ്രതികളെ ഇന്ന് കോടതിയിൽ ഹാജരാക്കും. നാമക്കൽ മജിസ്ട്രേറ്റ് മുന്നിലായിരിക്കും പ്രതികളെ ഹാജരാക്കുക.തമിഴ് നാട് പൊലീസിന്റെ പിടിയിലായ പ്രതികളെ വിട്ടു കിട്ടുന്നതിനായി കേരള പൊലീസ് കോടതിയിൽ പ്രൊട്ടക്ഷൻ വാറന്റ് സമ്മർപ്പിക്കും.
തൃശൂർ ടൗൺ ഈസ്റ്റ്, ഇരിഞ്ഞാലക്കുട എന്നീ പൊലീസ് സ്റ്റേഷനുകളിലെ ഉദ്യോഗസ്ഥർ തുടങ്ങിയവർ ഇന്ന് പുലർച്ചവരെ പ്രതികളെ ചോദ്യം ചെയ്തിരുന്നു. അറസ്റ്റിനിടെ പൊലീസ് ഉദ്യോഗസ്ഥന്റെ വെടിയേറ്റ് പ്രതികളിൽ ഒരാൾ മരിച്ച സംഭവത്തിൽ തമിഴ്നാട്ടിൽ ജുഡീഷ്യൽ അന്വേഷണം ആരംഭിച്ചിട്ടുണ്ട്. ഈ സാഹചര്യത്തിൽ പ്രതികളെ കേരളത്തിലേക്ക് മാറ്റുന്നത് വൈകാൻ സാധ്യതയുണ്ട്.
തമിഴ്നാട്ടിലെ കൃഷ്ണഗിരി ജില്ലയിലെ എടിഎം കവർച്ചക്ക് പിന്നിലും പിടിയിലായ പ്രതികൾക്ക് പങ്കുണ്ടെന്ന് സംശയമുണ്ട്. ആന്ധ്ര, കർണാടക എന്നിവിടങ്ങളിലെ എടിഎം കവർച്ചയ്ക്ക് പിന്നിലും ഇവർ പ്രവർത്തിച്ചതായാണ് സംശയം.
