ഷാർജ: 43 മത് ഷാർജ പുസ്തകോത്സവത്തിന് തുടക്കമായി.ഉദ്ഘാടന കർമ്മം നിർവ്വഹിച്ചത് ഷാർജയുടെ ഭരണാധികാരിയായ ഷെയ്ഖ് ഡോ സുൽത്താൻ ബിൻ മുഹമ്മദ് അൽ ഖാസിമാണ്.പുസ്തകത്തിൽ നിന്ന് ആരംഭിക്കുന്നു എന്ന സന്ദേശമുയർത്തിയാണ് ഇത്തവണ പുസ്തകോത്സവം നടക്കുന്നത്. എക്സ്പോ സെൻററിൽ നവംബർ 17 വരെയാണ് പുസ്തകോത്സവം.ഉദ്ഘാടനത്തിനെത്തിയ ഷാർജ ഭരണാധികാരിയെ ഉപ ഭരണാധികാരി ഷെയ്ഖ് സുൽത്താൻ ബിൻ അഹമ്മദ് ബിൻ സുൽത്താൻ അൽ ഖാസിമി സ്വീകരിച്ചു.
എസ്ബിഎ ചെയർപേഴ്സൺ ഷെയ്ഖ ബൊദൂർ ബിൻത് സുൽത്താൻ അൽ ഖാസിമി,ഷാർജ ഭരണാധികാരിയുടെ ഓഫീസ് ചെയർമാൻ ഷെയ്ഖ് സലേം ബിൻ അബ്ദുൽറഹ്മാൻ അൽ ഖാസിമി,സിവിൽ ഏവിയേഷൻ വകുപ്പ് ചെയർമാൻ ഷെയ്ഖ് ഖാലിദ് ബിൻ ഇസാം ബിൻ സഖർ അൽ ഖാസിമി തുടങ്ങിയവരും ചടങ്ങിലെത്തി.അറബി ഭാഷ, സാഹിത്യം, ശാസ്ത്രം, ചരിത്രം എന്നിവയെ പ്രോത്സാഹിപ്പിക്കുന്നതിനുള്ള ശ്രമങ്ങൾ തുടരുമെന്ന് ഷാർജ ഭരണാധികാരി പറഞ്ഞു. അറബി ഭാഷയുടെ 17 നൂറ്റാണ്ടുകളുടെ വികസനം 127 വാല്യങ്ങളിലായി രേഖപ്പെടുത്തിയ അറബിക് ചരിത്ര കോർപസിൽ ഭരണാധികാരി ഒപ്പുവച്ചു.
അറബിക് ഭാഷയെ കുറിച്ച് പഠനം നടത്തി ചരിത്രപരമായ ചരിത്ര കോർപസിനായി സംഭാവനനൽകിയവരെയും ആദരിച്ചു. 108 രാജ്യങ്ങളിൽ നിന്നായി ഇത്തവണ 2522 പ്രസാധകരാണ് പുസ്തകോത്സവത്തിൻറെ ഭാഗമാകുന്നത്. 63 രാജ്യങ്ങളിൽ നിന്നുളള 250 ലധികം അതിഥികളുമെത്തും.500 സാംസ്കാരിക പരിപാടികൾ ഉൾപ്പടെ 1357 പരിപാടികളും നടക്കും.
