കൊച്ചി: പൊലീസ് സ്റ്റേഷനിൽ ബഹളം വച്ച നടൻ വിനായകനെ പൊലീസ് അറസ്റ്റ് ചെയ്തു. എറണാകുളം സിറ്റി പൊലീസിന് കീഴിലെ നോർത്ത് പൊലീസ് സ്റ്റേഷനിലാണ് നടൻ ബഹളം വച്ചതും അറസ്റ്റിലായതും. മദ്യലഹരിയിൽ സ്റ്റേഷനിലെത്തിയ വിനായകൻ ബഹളം വയ്ക്കുകയും പൊലീസ് ഉദ്യോഗസ്ഥരെ അസഭ്യം പറയുകയും ചെയ്തുവെന്നാണ് പൊലീസ് പറയുന്നത്. പൊലീസ് സ്റ്റേഷൻ്റെ പ്രവർത്തനം തടസ്സപ്പെടുത്തിയതിന് വിനായകനെതിരെ പൊലീസ് കേസെടുത്തു. വിനായകനെ എറണാകുളം ജനറൽ ആശുപത്രിയിൽ എത്തിച്ച് പൊലീസ് പരിശോധനയ്ക്ക് വിധേയനാക്കി. താമസിക്കുന്ന ഫ്ളാറ്റിൽ ബഹളം വച്ചെന്ന പരാതിയെ തുടർന്നാണ് വിനായകനെ സ്റ്റേഷനിലേക്ക് വിളിച്ചു വരുത്തിയതെന്നും തുടർന്നാണ് സ്റ്റേഷനിലും നടൻ ബഹളം വച്ചതെന്നുമാണ് പൊലീസ് പറയുന്നത്. സ്റ്റേഷൻ ജാമ്യം ലഭിക്കാവുന്ന വകുപ്പുകളാണ് വിനായകനെതിരെ ചുമത്തിയിരിക്കുന്നത്.
