തിരുവനന്തപുരം: സിനിമാ – സീരിയൽ നടൻ ദിലീപ് ശങ്കറെ ഹോട്ടൽ മുറിയിൽ മരിച്ച നിലയിൽ കണ്ടെത്തി. തിരുവനന്തപുരം വാൻറോസ് ജങ്ഷനിലെ സ്വകാര്യ ഹോട്ടലിലാണ് ഇദ്ദേഹത്തെ മരിച്ച നിലയിൽ കണ്ടെത്തിയത്.
മൃതദേഹത്തിന് രണ്ട് ദിവസത്തെ പഴക്കമുണ്ട് എന്നാണ് സംശയിക്കുന്നത്. ‘അമ്മ അറിയാതെ, സുന്ദരി, പഞ്ചാഗ്നി അടക്കം ഹിറ്റ് സീരിയലുകളിൽ അഭിനയിച്ച നടനാണ് ദിലീപ് ശങ്കർ. ഒരു സീരിയൽ അഭിനയിക്കാനായാണ് ഇദ്ദേഹം ഹോട്ടലിൽ മുറിയെടുത്തത് എന്നാണ് വിവരം.
നാല് ദിവസം മുൻപാണ് നടൻ ഹോട്ടലിൽ മുറിയെടുത്തത്. എന്നാൽ കഴിഞ്ഞ രണ്ട് ദിവസമായി അദ്ദേഹം മുറി വിട്ട് പുറത്ത് പോയിട്ടില്ലെന്നാണ് ഹോട്ടൽ ജീവനക്കാർ നൽകുന്ന വിവരം.
ഒപ്പം അഭിനയിക്കുന്നവർ ദിലീപിനെ ഫോണിൽ വിളിച്ചിരുന്നെങ്കിലും കിട്ടിയിരുന്നില്ല. ഇവരും ഹോട്ടലിലേക്ക് അന്വേഷിച്ച് എത്തിയതോടെ ഹോട്ടൽ ജീവനക്കാർ മുറി തുറന്ന് നോക്കുകയും നടനെ മരിച്ച നിലയിൽ കണ്ടെത്തുകയുമായിരുന്നു
മരണത്തിൽ അസ്വാഭാവികതയില്ലെന്നാണ് പൊലീസിൻ്റെ പ്രാഥമിക വിലയിരുത്തൽ. മുറിക്കുള്ളിൽ ഫൊറൻസിക് സംഘം പരിശോധന നടത്തി. പോസ്റ്മോർട്ടം പരിശോധനയിൽ മരണകാരണം വ്യക്തമാവും എന്ന് കരുതുന്നതായി പോലീസ് പറഞ്ഞു.
