ദില്ലി: വിദേശ രാജ്യങ്ങളില് ഉപരിപഠനം നടത്തുന്ന ഇന്ത്യന് വിദ്യാര്ഥികളുടെ എണ്ണത്തില് ഈ വർഷവും ഗണ്യമായ വര്ധന. 2024 ലെ കണക്ക് പ്രകാരം വിദേശ രാജ്യങ്ങളില് ഉപരി പഠനം നടത്തുന്നത് 13 ലക്ഷത്തിലധികം പേരാണ്. ഏറ്റവും കൂടുതല് വിദ്യാർത്ഥികള് ഉപരിപഠനത്തിനായി പോയിരിക്കുന്നത് കാനഡയിലേക്കാണ്. വിദേശകാര്യ സഹമന്ത്രി കീർത്തി വർധൻ സിംഗ് രാജ്യസഭയില് ആണ് ഈ കണക്കുകൾ പങ്കുവച്ചത്.
13,35,878 ഇന്ത്യൻ വിദ്യാർത്ഥികള് വിദേശത്ത് ഉപരിപഠനം നടത്തുന്നു എന്നാണ് കണക്കിൽ ഉള്ളത്. 2023-ല് 13,18,955 പേരും 2022-ല് 9,07,404 പേരുമാണ് വിദേശത്ത് പഠനം നടത്തിയിരുന്നത്. പഠനത്തിനായി വിദേശത്തേക്ക് പോകുന്ന വിദ്യാർത്ഥികളുടെ വിശദാംശങ്ങള് സർക്കാരിന്റെ കയ്യിലുണ്ടോ എന്ന ചോദ്യത്തിന് രാജ്യസഭയില് രേഖാമൂലം നല്കിയ മറുപടിയിലാണ് ഇക്കാര്യങ്ങളുള്ളത്.
സർക്കാർ കണക്ക് പ്രകാരം ഈ വർഷം ഏറ്റവും കൂടുതല് വിദ്യാർത്ഥികള് പ്രവേശനം നേടിയത് കാനഡയിലാണ്. 4,27,000 വിദ്യാർത്ഥികളാണ് ഈ വർഷം കാനഡയില് പഠിക്കുന്നത്. 3,37,630 പേർ അമേരിക്കയിലാണ്. 8,580 പേർ ചൈനയിലും 2510 പേർ യുക്രൈനിലും 900 പേർ ഇസ്രായേലിലും 14 പേർ പാകിസ്ഥാനിലും എട്ട് പേർ ഗ്രീസിലും പഠനം നടത്തുന്നു.
വിദേശത്ത് പഠിക്കുന്ന ഇന്ത്യൻ വിദ്യാർത്ഥികളുമായി നിരന്തരം ആശയവിനിമയം നടത്താറുണ്ടെന്നും ഗ്ലോബല് റിഷ്താ പോർട്ടലില് രജിസ്റ്റർ ചെയ്യാൻ ആവശ്യപ്പെടാറുണ്ടെന്നും വിദേശകാര്യ സഹമന്ത്രി പറഞ്ഞു. അവർ പോകുന്ന രാജ്യങ്ങളില് എന്തെങ്കിലും സുരക്ഷാ പ്രശ്നങ്ങളുണ്ടെങ്കില് മുന്നറിയിപ്പ് നല്കാറുണ്ടെന്നും മന്ത്രി വ്യക്തമാക്കി. ലോകമെമ്ബാടുമുള്ള യാത്രകള് എളുപ്പമാക്കുന്നതിനായി ഇന്ത്യക്കാർക്ക് വിസ ഫ്രീ എൻട്രി, വിസ ഓണ് അറൈവല് സൗകര്യങ്ങള് എന്നിവ നല്കുന്ന രാജ്യങ്ങളുടെ എണ്ണം വർദ്ധിപ്പിക്കാൻ സർക്കാർ നിരന്തരം ശ്രമം നടത്തുന്നുണ്ടെന്നും മന്ത്രി കൂട്ടിച്ചേർത്തു.
